trök nao = Limburgs: wie sjrief ich det? =

103,4 foute

'n Bietje raekene lieërtj det de vieftig deilnummers daen aovendj same 5.170 foute gemaaktj höbbe. Gemiddeldj wurtj det 103,4 per deilnummer. 't Hieël dictee tèldje 305 wäörd en 't eigeste bietje raekene lieërtj det bie 't dictee idder derdje waord fout wórt gesjpeldj. Det sjreef ich hie 'n paar daag geleje. 103,4 foute in 305 wäörd.

Bie 't Groot Dictee der Nederlandse taal, wo ich jaore mit hieël väöl plezeer aan höb mitgedaon, zote echte gemein insjtinkers en mós se dök mer raoje nao wie 't ein of anger exotisch waord det de eine of angere sjriever weer 'ns örges woor taegegekómme, mós waere gesjreve. Döks bevóng dich de twiefel. Mót d'r hie noe waal of neet 'n sjtreepke? Mót dit waord mit 'n hoofletter? Mót ich dit waord aanein vas sjrieve? 't Woor aevel idder jaor opnuuj 'n bekans masochistich genot óm mit te doon.

Mer in 't Groot Limburgs Dictee det vurrige waek dinsdig wórt gehaje, zote gèn insjtinkers. Ich zoog allein mer wäördjes die geer en ich ós dageliks inne móndj numme. Es ich de eigeste zinne in 't Nederlands veurgesjótteld zów kriege, betwiefel ich of ich d'r überhaupt 'n fuitje in zów make.

103,4 foute in 305 wäörd woor 't gemiddeldje det de 50 deilnummers gemaaktj höbbe. Ein oppe drie wäörd. Ich sjreef nao ein vanne deilnummers dae zich bie mich beklaagdje det hae zoeëväöl foute hej gemaaktj, det hae zich neet hoofdje te sjame. De mieër es hóngerd zagte nieks euver häöm, mer alles en nog hieël get mieër euver 't 'gedroch' womit dae aovendj gesjpeldj mós waere.

Inne teks hie-ónger, de 305 wäörd van 't dictee mer den in 't Nederlands, höb ich 103 foute ingeboewdj. Waat zówtj g'r d'r van vinje es ein van eur kinjer of kleinkinjer zoeë zów sjrieve? Waat zówwe angere zègke es geer zoeë'n teks op papier zówtj zètte?