trök nao: "columns"

dertig jaor

Móch 't toch 'ns zoeë zeen det aod waere erfelik is en ich zoeëmer genóg genetisch materiaal van moderskantj höb mitgekrege. Ich kós nog hieël get jaore mit, op z'n mins 'n dieke jaor of dertig. Es ich mich den onnag 'ns bekiek wie moder op häör 95ste nog ónger de veut oet kumtj, den kómme dao bès nog hieël get jäörkes bie. Aod waere höbbe v'r aevel neet inne henj en v'r mótte ós oeteindelike laeftieje mer inne sjterre laote. Diezelfdje dertig jaor trökkieke geit get mekkeliker. Waat is de werreld verangerdj inne aafgeloupe dertig jaor. 't Is amper veur te sjtèlle waat v'r aan technologieje euver ós haer höbbe gekrege.

In 't Amerikaanse sjtedje Cambridge sjtuit 't MIT, 't Massachusets Institute of Technology. 't Wórt zoeë'n dertig jaor geleje opgerichtj door de visionaire professor Nicholas Negroponte. In det MIT wurtj allein nao veure gedachtj, gewèrktj ane toekoms. Daen eigeste professor goof dis daag 'n TED-präötje wo-in hae ós dertig jaor veuroet leet kieke.

Hae vertèldje det v'r ós sjtragkes mer 'n pilke in hove te numme en de ganse waordesjat en grammatica van 'n vraemdje taal nèsteltj zich örges in ós hersene. Altied al alles van Shakespeare wille laeze, wille kalle wie Brugman, dinke es Einstein, componere es Beethove en sjildere wie Rembrandt. 't Kin allemaol, geweun 'n uurke aan 't infuus. Es ich de tied van laeve van mien moder krieg, den gaon ich nog mitmake mich op mien viefennegetigste oet te kinne drökke in al mien favoriete dialecte. Den kal ich neet allein vloeiend Limburgs mer ouch Grunnings, Tukkers, Zieëws en net zoeë mekkelik Braobants, Oeas- of Wes-Vlaanders.

't Wurtj sjtevig sjlikke op mienen aojen daag.

© jan sjure, 18 juli 2014