trök nao: "columns"

gèn wäörd

De aafgeloupe waek hóbbe v'r god-wètj-wieväöl wäörd euver ós haer huuëre kómme óm god-wètj-neet-wieväöl ieëlenj te ómsjrieve. Terech, de ganse waek drejdje alles mer óm ein dink. 'n Aafgesjaote raket die zoeëmer zónger raeje ónvergaeflik 'n ónbegriepelik inj maakdje aan 298 ónsjöljige laeves. Op waeg nao hoes, op waeg nao waat 'n ónvergaetelike vakantie hej kinne zeen, op waeg veur 't werk, op waeg nao 'n groeët congres, op waeg nao d'n doeëd. D'r zeen gèn wäörd te vinje en gèn wäörd zeen oeëts genóg óm 't leid te besjrieve det wórt aangedaon door 'ne vinger op 'n knuupke. D'r gaon aevel nog god-wètj-wieväöl wäörd gezagdj en gezjwege waere inne sjpeurtoch nao ungerste sjtein.

In zien toesjpraok veur de Vereinigdje Naties dis daag hej diplomaat Frans Timmermans gèn hieël väöl wäörd nuuëdig óm 't geveul van 'n landj te besjrieve. Zien wäörd kome aan en belangrieker, ze bleve hange. De Raod sjprook sjanj van waat zich aafsjpeeldje nao de ramp. Woonsdigmiddig, nao de plechtige ceremonie op 't vleegveldj in Eindhove, hej ózze minister gèn wäörd nuuëdig óm zien indrökwèkkendje New Yorkse wäörd te óngersjteune. De beeldje vanne innige ómhelzing mit ein vanne naobesjtäöndje sjproke veur zich.

Daen hieële woonsdigmiddig wore gèn wäörd nuuëdig. Vieërtig kiste wórte zónger commentaar oet vleegtuge gehaoldj. Vieërtig kiste wórte zónger commentaar van Eindhove nao Hilversum gereje. Ich höb 'n paar oer zitte kieke en hej gèn wäörd nuuëdig. 'n Paar indrökwèkkendje oere hoofdje nieks gezagdj te waere. 'n Landj laefdje mit gèn wäörd mit. Óndanks de wermdje woonsdigmiddig bezörgdje ingetaoge applaus mieër hoondervel es 'n menuut sjtildje.

Zelje wórt d'r mit gèn wäörd zoeëväöl sjteun gegaeve.
Zelje höbbe v'r mit gèn wäörd zoeëväöl kinne zègke.

© jan sjure, 25 juli 2014