trök nao: "columns"

wildjgreuj

In Remunj is d'r 'ne tied geleje 'n hieël gedoons gewaes euver de wildjgreuj van reclame. Oppe oetvalswaeg wórs se sjteeds dökker geconfronteerdj mit sjrieëvendje borde óm dich dit of det, hie den waal dao aan te sjaffe. D'r wore nogal get luuj die zich dao behuuërlik aan sjtuuërdje. En terech, trailers en aanhengers vol reclame in weie, 't zuutj neet oet. Ich kin mich good veursjtèlle det d'r dao waal 'ns ènne van verraneweerdj wórt.

Gister loos ich inne gezèt det ze d'r inne gemèndje Ech-Zöstere ouch las van höbbe. Väöl inwoners höbbe zich d'r euver beklaagdj. De gemèndje haet dao gans terech oeëre haer en geit de wildjgreuj aanpakke. De vervoelers kriege 'n waek de tied óm de reclame weg te haole of d'r gaon boetes toet waal viefdoezendj euro oetgedeildj waere. Veur idderein oet Remunj en Ech-Zöstere dae toch reclame wiltj make höb ich aevel good nuuts. Kómtj mit eur trailers en borde nao de Maasgouw.

Bie mich oppe sjtraot hingtj al waeke 'n groeët sjpandook mit reclame veur 'n neet wiejer te benumme Braobants beermerk. Van sjtoep toet sjtoep, geweun euver de vol brèdje van jaowaal, de aopenbare waeg. Nao mien sjriftelike klach dao-euver bie de gemèndje kreeg ich 'n telefoontje van d'n ambtenieër dae dao euver geit. Oppe Maasgouw moog det geweun vertèldje hae mich, d'r is gèn gemèndjeverordening veur. Zoeëlang 't verkieër d'r gènne las van haet en d'r gèn kwetsendje tekste op sjtaon, kins se oppe Maasgouw reclame make veur egaal waat en nog sjónder, egaal wo se mer wils. Dames en hieëre adverteerders, haoltj eure zooj oet Ech-Zöstere en kómtj óngesjtuuërdj eur gengske gaon oppe Maasgouw. Wiezoeë wildjgreuj? Wiezoeë sjtraotvervoeling? Wiezoeë klagendje burgers? Oppe Maasgouw krejtj dao gèn hoon haer.

© jan sjure, 15 augustus 2014