trök nao: "columns"

raege

V'r höbbe mich get water euver ós haer gekrege de lèste tied. D'r wore buje wobie mien afveurpötje inne haof 't leet aafwete. 'Eige sjöldj, dieke böltj', dink ich es mien terras d'r weer 'ns oetzuutj wie 'n pierebadje. Hejs se 't graas mer neet mótte wegdoon. Vanne angere kantj, 't is ouch weer 'ne ganse zomer lank 'n heerlik geveul det ich neet mieër idder waek mit 'ne mejjer door d'n haof mót. Dao höbbe ze ós toch zeker neet veur oetgevónje tunktj mich.

Mer 't is neet allein mien aafveurpötje det 't oppertied neet aankin. Es ich laes en huuër wieväöl luuj zich de lèste waeke sjtevele höbbe mótte aandoon op plaatse wo ze normaal oppe sjloefe róndjtaffele, haet Pluvius 'ns duchtig hoes gehaoje. Neet allein kelders lepe vol, ouch complete woonkamers en keukes lete 't water mit bek tegeliek binne, de sjaaj löptj inne miljoene. Sjtraote sjtónge blank door te väöl besjtraote, 't water mós oeteindelik örges haer.

Twieë waeke geleje hejje v'r ós in 't Braobantse 'n heerlik klaorgemaaktj vèske laote sjmake. Ónger 't aafgezaegdj motto 'vès mót zjwumme', hej ich mich d'r 'n paar alcoholvrie beerkes bie laote insjödde. Trök heives begós 't veur 'ne augustusse zónjig väöls te vreug duuster te waere en nao óngevieër halverwaeges krege v'r de nuuëdige liters natigheid euver ós haer. Bekans thoes krege v'r ós huuëgtepuntj. Oppe Roerkade reje v'r ós bekans vas, 't leek waal of de Roer oet woor. Mien Braobants vèske kreeg ónbewusj ziene zin. Oppe terrasse wórte v'r door minnige i-phone veur de ieëwigheid vasgelagdj.

De film Naoch in 3D höb ich neet gezeen mer mit al die camera's op ós gerichtj, veuldje 't es of v'r in alle mer dinkbaar dimensies de hoofrol hejje.

© jan sjure, 22 augustus 2014