trök nao: "columns"

kaoreblomeroeëj zök

Ómdet v'r in ós vakantie nogal get wanjelinge veur de boeg hejje, hej ich mich veuraaf 'ns duchtig verwindj mit get nuuj zök die dao bliekbaar veur gemaaktj wore. Zök mit 'n comfortabel vootbèd, zök die neet zówwe roetsje, zök die es gegaote zówwe zitte. En veur de ieëste keer in mien laeve, zök die links en rechs gemerktj wore. Nuujsjierig gemaaktj door det nuuj fenomeen in mien laeve, deej ich ze mich ieës tegooj en daonao de linker rechs en d'n angere ómmesang aan. Wie ich 't ouch probeerdje, ich veuldje gèn versjil.

Wie ich ze netjes naevenein op taofel hej ligke veur wiejer óngerzeuk nao echte versjille, kreeg ich te huuëre det ich noe toch wurkelik 'n pan aaf hej. 't Raodsel bleef mich aevel bezig haoje en ouch 't halverwaeges 'n wanjeltoch wissele, brach mich neet wiejer. Op 't lès höb ich 't d'r mer bie en de zök de zök gelaote. V'r wore oeteindelik op vakantie óm van anger dinge te genete.

Zoeë zoog ich get roeëj bleumkes sjtaon die ich, net wie mien nuuj linker en rechter zök, nog noeëts hej gezeen. Ze hejje zoeë'n sjoeën depe roeëj kluuër det 't meujlik woor óm die te besjrieve. 'n Roeëd det ich mit gèn inkel anger raoed det ich kós wis te vergelieke. Ich koom neet wiejer es kaoreblomeroeëd ómdet 't blauw van kaoreblome mit van 't sjónste blauw is det ich kin. 't Roeëd van det ónbekindj bleumke woor zoeë sjoeën roeëd es wie sjoeën blauw 't blauw van 'n kaorebloom kin zeen. Zoeë filosoferendj wórt noe pas richtig tegooj aan miene geistestoesjtandj getwiefeldj. Ich zów neet ein pan mer 'n gans daak aaf höbbe. 't Maakdje mich neet oet, 't woor prachtig roeëd op mien nuuj zök.

© jan sjure, 5 september 2014