trök nao: "columns"

seks

Es 'n gesjprek op 'ne zónjignaonammedig in 'ne Mesjtreechse bilbliotheek euver seks geit, zóws se baoreweg dinke det d'r get mis is mit of de plaats, of de tied, of 't óngerwerp. Meh nieks van det alles, 't euverkoom mich dis waek. Ich sjtóng aojerwèts te klasjenere euver ós Limburgse taal mit 'n Neelse Mesjtreechtenieër wie 'n Vinlose aansjoof. Volges häör zów d'r inne Limburgstalige meziek te weinig seks te vinje zeen. Noe höb ich naeve nogal get Nederlands-, Ingels- en Franstalige meziek ouch 'n behuuërlike verzameling Limburgstalige loesterleedjes en ich kós neet ein-twieë-drie in ein van die veer 'n leedje euver seks te veursjien haole.

"Kiek 'ns nao 't Ingels", lag de dame oet Vinlo ós oet. "Leedjes wie: ' turn me on ' en ' light my fire ', die zègke 't waal neet hieël drek mer laote nieks te raoje euver". Ich woor verduutsj. "Kiek den 'ns nao 't Limburgs", vertéldje ze, "ech väöl wiejer es ' wengske aan wengske ' mit 'n ' veldjboeket ' bie 'n ' kepelke ' kómme v'r hie neet".

"Gelökkig mer", bedach ich mich, "det Thei en Marij of egaal waat veur anger Limburgs duo 't noeëts in häöre kop gehaoldj höbbe óm ' je t'aime, mois non plus ' in 't Limburgs oppe plaat te zètte". Meh loestertj 'ns nao ' brats ' van Zjèr Bataille, wo-in hae op heite kaole zitj ómdet emes 'm 't vuur inne vot haet aangesjtaoke. Gènne regel in ' kus mich dan ' van Arno Adams luuëtj aan dudelikheid te winse euver. Zoeë zów ich dees gezèt toch zeker half vol kinne sjrieve. Ich blief 't aevel ieëwigs jaomer vinje det ózzen eigeste Toon Hermans 't prachtige ' lente me ' neet in 't Limburgs haet gesjreve. ' September mich ' zów dizze maondj toch 'n väöl sjónder toet God-wètj-waat nuuëje zeen gewaes es ' turn me on '.

© jan sjure, 12 september 2014