trök nao: "columns"

betrèkkelik

Wo beeldje van anger recente executies angsvallig oet beeldj gehaoje waere, krege v'r maondigmörge al vreug 'n terechsjtèlling vol oppe veurpagina bie de kóffie. Óm 'n nog ónbekindje reje kome get wilj verkes inne Zuud-Wullemsvaart bie Wieërt terech. Sommige kóste bliekbaar neet zjwumme en móste in 't water häör lèste luuëdjes lègke. Die die waal de kuns van 't baove water blieve beheersdje, hejje gelök en wórte door de toegesjneldje brandjwaerluuj verlosj oet get waat waarsjienlik op 'ne boekcrawl mót höbbe geleke. Jaomer aevel veur die zjwumverkskes det de Zuud-Wullemsvaart neet oppe Mienwaeg of de Veluwe loog en ze toet óntsjtèltenis van 'n gans landj aafgeknaldj móste waere.

't Zoot ós behuuërlik hoeëg. Neet allein kamervraoge, ózze gedeputeerdje wórt bedreigdj en de verwinsinge aan 't adres vanne jaeger wore neet vanne lóch. Wie ich de foto's vanne executie zoog, vroog ich mich aaf woróm die brandjwaerluuj de verkes neet geweun aeve nao Hèrkebós höbbe verveurdj of wo dae jaeger inins vanaaf koom.

Aafgeloupe waekinj zeen d'r euveriges in anger water hieël get mieër doeëje gevalle. Inne Middellandse Zieë zeen dit jaor volges sjattinge al mieër es twieëdoezendj boeëtvluchtelinge verdrónke. Aafgeloupe waekinj 'n dreuvig deeptepuntj, vriedig róndj de viefhóngerd, zónjig nog 'ns euver de twieëhóngerd. Wo de verkes hie gèn benul höbbe van vasgelagdje grenze, zeuke doezendje Afrikane die grenze juus op. Haopendj op 'n bietje kwaliteit van laeve, numme ze bewusj de risico's van gammel volgepropdje buuëtjes ómdet alternatieve allerbelabberdj zeen. Waat zówwe die doezendje zich gaer 'ns geweun drök gemaaktj höbbe óm 'n paar aafgesjaote verkskes. 'n Kepot verke maondig oppe veurpagina, dinsdigmörge op pagina zeve en woonsdig op pagina tieën de hóngerdje doeëje van 't eigeste waekinj. Waat is alles betrèkkelik.

© jan sjure, 19 september 2014