trök nao: "columns"

de moes en de poes

Geweun óm d'r zeker van te zeen 'm oppe daag van oetkómme te kinne drejje, hej ich 'm mich al op veurhandj besjtèldj. De nuuj CD van Leonard Cohen litsjdje op ziene verjäördaag door miene brevebös. Noe 'n paar daag later, is d'r al bekans zoeë gries gedrejdj es 't ringbaerdje womit de tachtigjäörige zich op 't hoesje presenteertj. Vanaaf wied trögkes inne vurrige ieëw bön ich 'm blieve bewónjere.

Mit dees nuuj CD haet d'r 't euvertugendje bewies geleverdj det aojerdóm neet allein whisky en wien mer ouch meziek luuëtj riepe. 't Is aevel neet allein zien sjtum, ouch zien tekste zeen krelkes óm gèn genóg van te kriege. Ein nummer veel mich bezónjer op. Wie hae in 't nummer 'almost like the blues' mit riemwäördjes sjpeeltj, is neet allein sjoeën óm te huuëre, nog sjónder is 't óm de teks oetgesjreve te zeen sjtaon. De titel van 't nummer kumtj in 't leedje veer keer veur.

'Almost like the blues' , veer keer opnuuj en veer keer prachtig op riem gezatj mit: 'I was staring at my shoes' , 'there's all my bad reviews' , 'of the Gypsies and the Jews' en 'that a sinner can't refuse' . Blues, shoes, reviews, Jews en refuse, vief keer dezelfdje klank, vief keer gans anges gesjreve. Poëet Cohen hej zoeë wiejer dichtendj onnag geweun beveurbeeldj 'truth', 'choose', 'tattoos', 'queues', 'smooth', 'two's' en 'throughs' kinne gebroeke óm mit anger waordbeeldjer nog sjteeds op riem te blieve. Zoeë loesterendj mós ich aan ós Limburgse wäörd dinke. Waat höbbe v'r hie mit ós sjtoeët-, duuj-, trèk- en sjleiptoeëne toch 'n lestige taal. Moes en poes lieke den waal opein, rieme doon ze aeve min es wie ze zich moge of wie poeze det op moeze doon.

© jan sjure, 26 september 2014