trök nao: "columns"

nao hoes

Hae wórt gister ónverwachs trögkes nao de provincie gesjtuurdj. Nao hoes ómdet hae, volges de luuj die 't allemaol kóste wete, de internationaal belange van Nederlandj neet tegooj zów höbbe verdedigdj. 'ne Regel dae ich gister inne gezèt loos. De groeëte baas van waat nog neet zoeë hieël lang geleje ós nationaal gruuëtsjigheid woor. Zien contrac leep eigelik nog mer de luuj die 't allemaol kóste wete, zoge gènne heil mieër in 'n wiejer samewèrking.

't Sjtökske hej zoeëmer euver ózze Guus kinne gaon. Eigelik hej ich de ganse waek al verwachtj det 't baovesjtäöndje euver de falendje opvolger van de toet wied inne hemel gepreze van Gaal zów höbbe gegange. En waarsjienlik woor ich neet d'n insigste. Ich höb de wedsjtried neet gezeen dus ich kin d'r eigelik neet euver mitkalle. Alles waat aevel nao de wedsjtried euver ós haer is gekómme woor neet te misse. Aafgank, fiasco, flop, miskleun, mislökking, sof, zepert en nog 'n ganse gats anger superlatieve lepe naeve de revue nao 't echec in Ieslandj.

Meh nieks van det alles. Guus zitj nag op zie plekske en ózze Camiel kós zich 't ieëste 't bèste vleegtuug nao Mesjtreech-Aachen-Airport pakke. Noe geit d'r weer hieël get water door de Maas tösse de dónderdigmörge det ich dit zit te sjrieve en de vriedigmörge det g'r dit zitj te laeze. 't Zów dus zoeëmer kinne zeen det waat ich gister loos vandaag weer inne gezèt sjtuit. Alexander Curly zóng 't jaore geleje al mit 'ne Achterhookse tóngval: 'Guus kom naar huus want de koei'n staon op spring'n' . Es ich Hiddink woor, heel ich de ieër aan michzelf. Ich ging net wie Camiel trök de provincie in. Trök nao hoes. Dao sjtaon kuuj te sjpringe. Dao gebeurtj tenminste nog 'ns get inne wei.

© jan sjure, 17 oktoeëber 2014