trök nao: "columns"

vraoge, vraoge, vraoge

Det Leudal toch. De regiogezèt leek gister waal 't Leudalnuuts. 't Bäömke van 't Leudalpötje is bekans in zich. De nog jóng gemèndje haet bliekbaar jaorelank op te groeëte voot gelaefdj. Wèthaojer Verlinden sjuuftj de zjwarte Piet (of moog ich die oetdrökking neet mieër gebroeke) door nao veurgaondje besjtuurders die zich de vingers neet aan bezuniginge höbbe wille branje. Bibliotheke mótte dich, seniore haoje crisisberaod en meziekgezelsjappe vreze dramatisch cultuurverlees. De burgers gaon 't veule en wille det 'ns tegooj laote huuëre. Wie kin det baeter es mit 'n serenaadje.

Es 't aan Peter Derks, de veurzitter vanne Meziekfederatie Leudal, ligktj, geit det binnekort gebeure. Op 4 november kumtj de raod weer bie ein. Es 't allemaol geit lökke, sjtaon alle vieftieën hermenieje en fanfares den oppe sjtoep van 't gemèndjehoes óm trómmelendj en träötendj aan te gaeve 't neet ins te zeen mit de mer leefs negetig procent geplandje korting op häör belangriekste brónne van inkómste. De muzikaal manifestatie zal zeker neet bedoeldj zeen óm 'n hertje ónger de aan te haole boeksereme te sjtaeke.

Veur 't Leudalse vereinigingslaeve is 't aevel te haope det d'r, óndanks 't muzikaal geweldj boete, genóg vraoge euver de doeëdsjteek veur de gemeinsjap gehuuërdj kinne gaon waere. Vraoge, vraoge, vraoge die frusterendj väöls te väöl op 't college aafkómme en die, volges 't eigeste college angerhalf toet twieë ambtenieëre aan 't werk haoje en zoeë klawwe vol geldj koste. Geldj det d'r in Leudal dudelik neet mieër is. Zeker neet noe 'n plaatselike sjtudente journalistiek 'n euveriges belachelike raekening van 1000 euro veur get kopieerwerk neet hooftj te betale. En det terwiel de dame in kwestie allein mer get vraoge hej óm 'n sjoeëlopdrach gedege oet te kinne veure.

© jan sjure, 24 oktoeëber 2014