trök nao: "columns"

zörg óm zorg (5)

Wie ich viefenvieërtig jaor geleje inne verpleging ging, woor de zörg nog mer 'n fractie van waat ze noe is. Väöl van waat doe normaal woor, zów noe iddere daag de gezèt haole. Es ieëstejaorslieërling hej ich al gelieërdj wie ich emes mós wasse, de blooddrök opnumme, 'n sjpuit gaeve of 'ne catheter inbringe. Ich wis det 'ne thermomaeter drie minute mós blieve zitte en det infuusflesse neet laeg móchte loupe. Mien twieëdje aafdeiling woor 'ne groeëte zaal mit viefentwintjig chirurgische patiënte. Es ieëstejaorslieërling zoot ich d'r allein inne nachdeens. Allewiel bekans neet mieër veur te sjtèlle.

Waat is 't gaondjewaeges óngeluiflik väöl baeter gewaore. Neet allein inne ziekehoezer, ouch inne verpleeg- en verzörgingshoezer. Camera's óngersjteune 't toezich. 'n Gerösdje gedachte veur 't geval det d'r 'ns emes op zów moge sjtoan of nog erger, oet bèd móch dreige te valle. Verpleegkunde is 'n sjlech betaaldje weitesjap gewaore mit de meis oeteinloupendje sjpecialisaties. D'r waere beveurbeeldj ganse congresse gehaoje allein al euver incontinentie. V'r sjtoppe neet euveral zoeëmer 'ne catheter in es d'r 'ns get laektj. Ich höb jaore gewèrktj bie 'n firma die miljoene sjtiktj in óngerzeuk nao incontinentiemateriale en de gevolge van incontinentie op naat waerendj vel.

'Soms loopt urine langs haar enkels ', köpdje 't AD vanne waek. De discussie bie Pauw woor neet vanne lóch, 't landje twitterdje d'r duchtig op los. Kritiek oppe zörg, 't is weer mekkelik score veur de oppositie. De opmerking van Sjtaatssecretaris van Rijn det de opleiding van 't personeel ein vanne oeërzake zów kinne zeen, sjoot mich behuuërlik in 'n verkieërdj kaelsgaat. Gelökkig woor d'r nog Heleen Dupuis, de veurzitster vanne Raod van Toezich vanne aangevalle zörgcentra. Beeldje die neet mit feite gesjtaafdj waere. Häör relativerendj vermoge noom get van mien zörg weg.

© jan sjure, 7 november 2014