trök nao: "columns"

de sjtad

Vanoet Lin ginge v'r vreuger noeëts nao Remunj, v'r ginge nao de sjtad, oet inne sjtad, winkele inne sjtad en inne sjtad nao sjoeël. Remunj, 'de sjtad', 'ós sjtad', 'mien sjtad', 't liektj waal get óm taegenop te kieke, get bezónjers, get óm gruuëtsj op te zeen. Inj 2008 wórt ónger de naam 'het oog van Midden-Limburg' 'n regiovisie 2008-2028 gepresenteerdj wo-in de ambitie van de regio woor opgenómme. Bekans hóngerd pagina's wo-in zich euver 'de sjtad' leet laeze det ze vanwaege häor ligking 'n groeët potentieel kin beje veur ónger angere natuur en landsjap.

Det gaajdje mich waal, 'de sjtad' ómsingeldj door natuur wie 't Leudal, de Mienwaeg en 't Roerdal. In de visie sjtóng wiejer det 't hel nuuëdig is óm waat natuur betruftj, wo meugelik alles van waerd te besjerme en zoeë nuuëdig opnuuj in te richte. Ane randj van Remunj ligke nog 'n paar lepkes gróndj die neet allein 'n hoeëg landsjappelike mer onnag 'ns geomorfologische waerd höbbe. Róndj Kitskesberg en Schöndele zeen nog de unieke parabooldune te zeen wie die gans hieël vreuger in ós doe nog óngereptj Midde-Limburgs landsjap vorm höbbe gekrege.

Sjtökskes landsjap óm allein daoveur al te koestere nog los van de ecologische waerd. Besjermdje saorte höbbe d'r vrie baan, veldjlieëwerike fladdere d'r, buzerds vange d'r häör proeëj. D'r is zoeëgaar 'ne dasseburch aangetróffe. D'r hoof nieks opnuuj ingerichtj te waere, 't ligktj allemaol geweun ane randj vanne sjtad. Noe nog bekindj ónger de naam 't Mieëlickerveldj, es Remunj zien zinne doordrieftj dalik ónger de naam Kaleidos, 'n nuuj wiek mit 468 weuninge. Wiezoeë geomorfologische, ecologische en landsjappelike waerd? In waat altied 'mien sjtad' woor, regeertj noe de heilige euro. Remunj, Remunj, Remunj: doeëdzunj.

© jan sjure, 21 november 2014