trök nao: "columns"

oppe echelste puuët

In Wieërt ligktj 'brasserie Gruuëts'. Ich bön d'r noeëts gewaes mer goonsdigaovendj huuërdje ich det se d'r good kins aete. Op 'nen aovendj euver de Limburgse taal en veural häör sjpelling, ging 't euver de sjriefwies van de unieke klanke die v'r op väöl plaatse in Limburg de godganselike daag gebroeke. Mer 't ging veural euver de naosjlaeg die v'r aan bepaoldje klinkers gaeve. In: 'op 't buuëtje wurtj sjoeën gefieësj', sjtaon de drie diftónge naevenein die g'r hie in mien waekelikse sjriefsels regelmaotig taegekómtj. In Remunj 'feeste ze sjoon op 'n beutje' en zoeë sjrieftj 't Remunjs zich 'n sjtök mekkeliker. Mer efeng, 't ging euver de sjriefwies van die naosjlaeg.

Ómdet v'r veur 't Limburgs gèn greun beukske höbbe wo-in idder wäördje toet inne puntjes te vinje is, wurtj hie gemeinlik de sjpelling aangehaoje die is neergelagdj in de Sjpellinggids 2003. Alles waat g'r hie idder waek kintj laeze, is gesjreve volges die sjpellingregels. Toet goonsdigaovendj de naosjlaeg en veural de 'uuë' ane beurt kome: 'n gruuëtsj sjtuuëtje mit 'n druuëg kluuëtje in 'n buuëtje.

Noe hejje alle cursiste goonsdigaovend die eigeste sjpellinggids oetgereiktj gekrege. 'ne Oplettendje lieërling sjtook ziene vinger op en leet wete det al mien 'uuë-klanke' fout gesjreve wore. 'De klank 'uuë' sjtuit d'r neet in', leet hae gruuëtsj wete. Ich wis neet waat ich huuërdje en aeve later neet waat ich zoog. De puntjes wore inne nuuj gedrökdje gidse verdwene. Oppe echelse puuët laot ich uch bie deze wete det ich veur 't ieës in jaore vanne sjpellingregels gaon aafwieke. In 'gruuëtsj' blief ich gewuuën de puntjes oppe 'e' zètte. Es ich binnekort bie Gruuëts in Wieërt gaon aete, gaon ich ze dao tösse soep en aerpel vraoge of ze die puntjes estebleef oppe kaart laote sjtaon.

© jan sjure, 28 november 2015