trök nao: "columns"

hóngerd

In 1936 woor Daan Kagchelland de lèste Nederlandse zeiler dae olympisch goud wón in 'n buuëtje. Hae deej det oppe beruchdje Hitler-Sjpele in Berlien. Euver die sjpele haet dr. Lou de Jong in 'Het Koninkrijk der Nederlanden in de Tweede Wereldoorlog' 't ein en anger gesjreve. In daen indrökwekkendje riedel beuk zeen ónger angere hieël get achtergrunj van de sjoldaot van Oranje te laeze wo-in de rol van Ernst de Jonge wurtj besjreve (in de verfilming gesjpeeldj door Jeroen Krabbé). Net veur, halverwaege en op 't inj van dae oorlog wórt Theo Middelkamp Nederlands kampioen wielrenne. In die jaore wórt väöl geloesterdj nao Radio Oranje wo de sjriever Jan de Hartog korte verhäölkes veurloos.

Kagchelland, de Jong, de Jonge, Middelkamp, de Hartog, zoeë mer get bekindje mansluuj die, es ze nog gelaefdj hejje, dit jaor hóngerd zówwe zeen gewaore. Net wie beveurbeeld Alexander Pola, G.B.J. Hiltermann, Bertus Aafjes, Deng Xiaoping, Thor Heyerdahl, Louis de Funès. Gebaore in 't jaor wo-in kroeënprins Franz Ferdinand van Oeësteriek wórt vermaordj, 'ne maord mit dramatische gevolge. In 't jaor wo-in 't gaasmasker wórt oetgevónje of wo-in veur de ieëste keer get door 't Panamakanaal voor.

Es d'r nog gelaefdj zów höbbe, zów mien vader mörge hóngerd zeen gewaore. In gèn inkel gesjiedenisbook zal ziene naam opduke, in mien perseunlik gesjiedenisbeukske kumtj d'r aevel dök veur. Zónger häöm woor ich neet wie, waem,waat en wo ich noe bön. Zónger häöm wore ich, mien kinjer en kleinkinjer d'r zoeëwiezoeë noeëts gewaes. Wie dök höb ich de lèste jaore neet gedachtj: " hej d'r det nog 'ns mit moge make" of "waat zów d'r gruuëtsj gewaes zeen ". Mörge, op ziene hóngerdste gebäörtedaag, kumtj óngetwiefeldj de gedachte op: "hej vader det nog 'ns mit kinne make".

© jan sjure, 5 december 2014