trök nao: "columns"

braom

Veural bie kaoj, sjtörm, nöt, ón- en raegewaer, es se nog gènne hóndj, laot sjtaon anger bieëste of zoeëgaar luuj nao boete sjiks, is 't sjoeën óm dich d'n aoje, käöjelike sjaopsherder 'ns te besjnoutse, es hae mit 'ne doorweikdje hood, zien aafgetraoje sjtevele en 'ne krómpgetrokke sjtek óngeren erm, hie oppe hei 'n bergske aafbanjertj en zien sjäöpkes nao häör voor luuëtj zeumere.

Waarsjienlik dinktj g'r nao 't laeze van die zin waal det d'r get neet mieër richtig tiktj tösse mien oeëre. Mer laotj mich uch oet d'n druim helpe. Ich gaef waal 'ns 'ne cursus "Limburgs: wie sjriefs se det?" en op 't inj laes ich de zin hiebaove veur. Ich daag de deilnummers oet die veerenzèstig wäördjes foutloos op papier te kriege. 'n Paar waeke geleje woor 't 'ne cursis op ein fuitje nao bekans gelöktj. Op Facebook loos ich gistermörge: "det klopt, krieg ut gaar neet geupend". 't Mós bliekbaar veur Limburgs doorgaon. Waarsjienlik wórt bedoeldj det 'n document neet geäöpendj kós waere. Ich kreeg vanbinne en vanboete 'ne acute aanval van jeuk.

Vanbinne en vanboete mótte aanein gesjreve waere lieërdje ich in 't Groeët Nationaal Dictee woonsdigaovendj. Ouch lieërdje ich det es se mit twieë man in 'n gesjlaote rietuugske kins zitte en dich door ein paerd kins laote trèkke, de kans groeët is det se in 'ne braom zits. Ich hej 't zoeë oetgesjpraoke brougham den waal good, mer ónterech mit 'n hoofletter gesjreve. Net wie Medoc euveriges. Same mit nog ach anger fuitjes, brachte die twieë hoofletters mien score op tieën. Gruuëtsj kós ich mien jaor aafsjloete. En daomit sjloet ich dit jaor druimentaere aaf en wins ich uch sjoeën fieësdaag en 'n good begin van 't nuuj jaor.

© jan sjure, 19 december 2014