trök nao: "columns"

trögkes

Zoea gans aan 't begin van 'n nuuj jaor huuërs se eigelik veuroet te kieke. Ich gaon aevel nog aeve trögkes 't vurrig jaor in. Trögkes nao de brandj, trögkes nao de asbes, trögkes nao de sjpooksjtad, nao aafgesjlaote waeg mer veural trögkes nao alles waat 'n paar daag gesjlaote mós blieve op waat veur hieël get óngernummers 't hoeagtepuntj van óngernumme hej mótte waere. Trögkes nao waat alweer bekans vergaete is. Mer veural trögkes nao de gezèt vanne zaoterdig veur Kersmis.

Paginagroeat leet zich laeze det Remunj weer aope woor, det in Remunj mer leefs 'n ganse waek ouch saoves boeadsjappe gedaon kóste waere, det Remunj weer geweun mitdeej. Geweldig nuuts veur idderein dae nog 'n paar cent mós verdene zoea op 't inj van 't jaor. Jaomer aevel det zich örges emes achter 'n bureau haet oet zitte fiespernulle det 't allemaol get mieër krach zów oetsjtraole op zich Ingels. "We're open", "late night shopping" of nog erger: "Roermond back in business".

Ich kós 't neet vatte. 't Zów waarsjienlik neet allein mich pas ech gegaajdj höbbe es 't geweun in 't Remunjs zów zeen gesjreve mer allè, euver Nederlands hejtj g'r mich neet gehuuërdj. Es d'r gekeke zòw zeen gewaes nao 't winkelendj potentieel en alles in 't Duits zów zeen opgesjtèldj, hej ich 't aevegood vraemdj gevónje mer d'r nog enig begrip veur kinne opbringe. 'n Boeadsjap aevel, die zoea plaatselik getintj is, in 't Ingels ónger 't vootlich te bringe, ging mich 'n Roer- en 'n Maasbrök te wied. Veur de formateur van daen ónzin höb ich mer ein boeadsjap: "where the f... are you coming from?" Of in geweun Limburgs: "keutel, keutel, waem haet dich in godshieëresnaam gesjete?"

© jan sjure, 2 januari 2015