trök nao: "columns"

neutele

Mörge gaon ich 'm veur 't ieës in jaore misse. Mörgevreug is miene horizon anges gekluuërdj es wie ich det verwachtj zów höbbe. Get valer es wie d'r det bekans tieën jaor lank ómme vieërtieën daag woor. Ómme vieërtieën daag zal 't aeve winne waere. Ómme angerdje waek, örges halverwaeges de zaoterdigbielage wie vanzelfsjpraekendj, gans rechs de rubriek "taalcultuur", gans links "typisch limburgs". Bekans tieën jaor móchte v'r mit Guus Urlings op zeuk in de marges van ós taal, ózze cultuur en veural nao det waat ós 'n Limburggeveul zów gaeve.

't Kós zoeë gek neet bedachtj waere, of 't is veurbie gewaes. Of wie hae 't in ziene lèste typisch sjreef: van gruuëtsj en content, van vlaai toet vastelaovendj en van taal nao sjötterie. Tieën jaor gesjtraevel en gesjtechel euver alles waat ós Limburgers Limburgers maaktj. Höbbe die tieën jaor zeuke get opgeleverdj? Is d'n typische Limburger gevónje? Waat maakt 't eigelik oet, v'r höbbe tieën jaor moge genete.

Ich móch 'n paar keer figurere in die rubriek. 't Zal uch neet verwónjere det 't den gemeinlik euver ós Limburgs ging en veural wie v'r det 'n bietje laesbaar op papier zówwe mótte kinne kriege. Oeëts móch ich d'r laeze det ich in bepaoldje kringe in 't Limburgse nogal 'ns wórt aafgedaon es "neutelaer". Veur de hollachtone ónger de laezers vertaaldje Guus det netjes es "zeurkous". Mit "neet alle gezeur is gezeur, es g'r begrieptj waat ich bedoel", kreeg ich aevel 'n hert ónger miene reem. Neet idder geneutel is geneutel. Ich zal wiejer neet neutele det "typisch Limburgs" neet mieër ane horizon te zeen zal zeen. Soms kins se neutelentaere ouch geweun "danke" zègke. Daomit gaon ich typisch Limburgs misse veurluipig. 't Begintj mörgevreug al.

© jan sjure, 9 januari 2015