trök nao: "columns"

rabarber barbara

Vurrige waek promoveerdje Tilburgenieër Koen Sebregts ane Universiteit van Utrech op 'n veer jaor doerendj óngerzeuk nao de letter R. De belangriekste conclusie in zien proofsjrif is det 't Nederlands mer leefs twintjig versjillende R'e haet. Det v'r d'r väöl hejje wiste v'r al, twintjig variante aevel sjientj groeët nuuts te zeen. Zoeë kin de R achter of veur inne móndj waere oetgesjpraoke waat den respectievelik 'n huig-R of 'n tóng-R oplevertj. En es ich 't allemaol good begrepe höb, kin die lèste weer mit 'ne opgeroldj puntje of mit de ganse tóng nao achter geproduceerdj waere.

Mit de meis geavanceerdje apparatuur haet de promovendus twintjig versjillendje R'e in 't Nederlands taalgebied kinne isolere. Zoeë sjiene in "Rabarber Barbara" nogal get versjillendje R'e veur te kómme wovan de meiste neet mit bloeëte oeëre te huuëre zeen. Toch haet 't Nederlands mer ein teike nuuëdig óm ze op papier te kriege. Sjtèltj uch 'ns veur det mit 't Nederlands 't zelfdje woor gedaon es waat v'r mit ós Limburgs doon. Den hejje v'r mit sjtreepkes, heudjes, trema's, tildes en cedilles baove en ónger ós R'e zitte aanmóddere.

Waat höbbe v'r d'r mit ós Limburgs 'n zootje van gemaaktj. Idder meugelik klankversjil det mit bloeëte en oetgesjpaote oeëre neet te huuëre vèltj, haet hie 'n eige teike gekrege. Ich höb 'ns oeëts geturfdj in Limburgse sjpellinggidse en waordebeuk en koom op 216. En det geit 't allein euver klinkers. 't Werreldwied gebroekdje fonetisch systeem det idder taal of dialec op papier kin kriege haet d'r waalgetèldj 174. Daomit kinne zoeëwaal alle klinkers, es ouch alle mitklinkers gesjreve waere. 't Proofsjrif maakdje in idder geval mich mer weer 'ns get dudelik. Es 't Nederlands twintjig R'e mit ein teike kin vange, is aan 't Limburgs nog werk zat.

© jan sjure, 16 januari 2015