trök nao: "columns"

vrieheid

Grüss Gott. In Oeësteriek wurs se zoeë dök ónthaoldj. Ouch in 't depe zuje van Duitsland is 't 'n väöl gehuuërdje begroeting. In 'n reportage euver de Patriottische Europeane taege de Islamisering van ós Aovendjlandj (Pegida) huuërdje ich dis daag 'n protesterendje vrouw oet Münche bezörgdj zeen det ze meugelik binnekort häör geleefdj "Grüss Gott" neet mieër zów moge gebroeke. Ze vónj 't mer nieks mit al die moslims op 't Pruses. Ze wól häör vrieheid blieve haoje óm te doon, zègke, sjrieve, teikene en num mer op wie 't häör oetkoom.

Ich vinj 't allemaol get wied gezóch. Ich dörf hie mit 'n gerösj hert "godverdomme" te sjrieve. Mesjien det emes vanne Bóndj taege 't Vloke mich dao op zal aansjpraeke mer zoeëlang d'r det neet mit 'ne kalashnikov duit, maak ich mich dao neet ech hieël drök euver. Ouch in Duitslandj zal 't allemaol zoeë'n vaart neet loupe. Meh good, ich bön 't gans mit Frau Merkel ins det ouch Pruse die meine det ze es Pegidane de sjtraot op mótte, de vrieheid höbbe óm det te doon.

Net zoeë good mót Lutz Bachmann, de leider van Pegida, de vrieheid höbbe óm te doon, te zègke, te sjrieve, te teikene, waat hae wiltj. Hae haet 't rech en de vrieheid óm asielzeukers te ómsjrieve es bieëste, es tuug of es voelnis. 't Is zien rech en zien vrieheid óm 'n selfie mit Hitlerkapsel en -sjnörke op zien facebookpagina te publicere. Aan die vrieheid mós se neet torne. Zeker es Pegidaïs mós se dao rumer es ruumdinkendj mit óm kinne gaon. Extremer kós Pegida zien óngeluifwaerdigheid aevel neet de sjtraot op bringe es wie 't ieëgister ziene groeëte leider es aod voel aafserveerdje óm 'n grappig bedoeldj sjpotprintje.

© jan sjure, 23 januari 2015