trök nao: "columns"

vrieheid

Ich weit neet hieël väöl van gene en chromosome mer ein dink van de allerkleinste boewsjteinkes die ós toet ós make, sjtuit wie 'ne paol baove water. Waat einmaol in ós DNA is vasgelagdj, ligktj dao netjes verankerdj in normaal gesjpraoke zèsenvieërtig chromosome. Vanaaf d'n daag det d'r laeve is op ózze werreld, is alles waat laeftj zoeë bepaoldj. 'n Geniaal oetzónjering zeen ós gesjlachcelle. Net wie 'n mannelik zaodcelke haet ouch 't vrouwelik eicelke mer drie-entwintjig chromosome. Ze höbbe zich óngerein nuuëdig óm same 'n nuuj cel te make die alles bie ein opgetèldj weer toet de zèsenvieërtig kumtj die nuuj laeve maaktj.

Al waere d'r god wètj wieväöl miljoene zaodcelle op 'n huipke gegoeëdj, al waere d'r twelf condooms in eine prullebak gedeponeerdj, al geit zich egaal wieväöl sjperma minge, gedege DNA-óngerzeuk zal alzelaeve aantuuëne oet welke piemelkes welke zäödjes gezejdj zeen. D'r zeen mer drie-entwintjig chromoseumkes nuuëdig. Oet welke doem d'n advocaot van verdachdje A. zich daen ónzin van ónbroekbaar vermingdj zaod gezaoge haet weit ich neet mer ich zów mich gaondjeweg duchtig óngerösj gaon make es ein van mien zaodcelkes in 'n prullebekske in 'n Valkebergse hotelkamer terech zów zeen gekómme.

Bie 'ne angere advocaot in dees zaak is 't kwartje bliekbaar waal gevalle. Waat wól d'r anges, bie häöm höbbe zich viefentwintjig zaodzejjers veur raod en biesjtandj gemeldj. Hae haet ze aafgeraoje DNA aaf te sjtaon. Viefentwintjig hoereluipers die inins 'n sjlech gewete höbbe ómdet ze zoeë nuuëdig mit 'n maedje van zèstieën dinger móste doon wo maedjes van zèstieën neet veur bedoeldj zeen. 'n Sjtraofbaar feit det in ós sjtraofrech terech zjwaor genóg is óm verplich DNA aaf te mótte sjtaon. Det advocaote nieks van gene wete moogs se ze neet kaolik numme. Det ze ós wètbook neet kinne aevel des te mieër.

© jan sjure, 30 januari 2015