trök nao: "columns"

einzaam

Mit eine allein is 't lestig same zeen en es bekans vanzelfsjpraekendj wurtj 't den d'n einzame. Ich vinj 't 'n gek waord, eint det zichzelf 'n bietje taegesjpriktj. Contradictio in terminus hètj det op zich gelieërdjs. 'n Combinatie van twieë wäörd die eigelik ónmeugelik is. Einen óngerein, ouch zoeëget, of roeëje sjnieë beveurbeeldj. Wiewaal einzaam es waord dus eigelik neet veur zów moge kómme, treffe v'r 't es versjiensel mieër en mieër aan.

De gezèt sjtóng d'r dis daag vol van. 't Zów get kort door de boch zeen óm noe al te rope det de 'ne goje maondj geleje ingeveurdje bezuniginge inne zörg noe al mit vruchte beginne te sjmiete, mer de GGD's kome mit 't nuuts nao boete det mer leefs 43% vanne Limburgse 65-plussers einzaam is. 10% daovan is zoeëgaar ernstig einzaam. De zorgkoepels vreze det 't allemaol nog erger geit waere en zeen extra alert. Alarmfase oranje volges de Katholieke Bóndj van Aojer Luuj. De kanker van dizze tied. De gezóndjheidsrisico's van einzaam zeen zówwe waal 'ns hoeëger kinne oetpakke es die van 't rouke, köpdje de veurpagina.

D'n einzame, wie groeët 't probleem ech geit waere zal nog waal oere dras, drab of drozele loere waere, van ein dink aevel kinne v'r waal zeker zeen. De kómmendje daag gaon v'r d'r van genete. Ze kómme oet de sjtal en van achter de geraniums oet. Ze zeen de kómmendje daag weer te bewónjere. Ós einzelgängers, noe nog aeve weggeduujdj tösse wages, zate hermeniekes en anger joeksgeweldj, kriege binnekort alle aandach vanne werreld. 'ne Eige optoch allein veur einzelgängers. Zónnen aandach zówwe v'r aan ózze greujendje groep einzame mótte gaeve. Mesjien waal ónger 'ne angere naam. Einzelgänger liektj mich waal get.

© jan sjure, 13 februari 2015