trök nao: "columns"

det, dae, die

Ich weit neet of 't d'r aan ligktj det ich d'r zelf idder waek ènne sjrief, mer d'r zeen inne twieë gezètte die idderen daag op mien veurdeurmat litsje, neet väöl columns die óngelaeze bie 't aod pepier gaon. Aafgeloupe zaoterdig sjtóng d'r ènne inne Volkskrant dae ich gaer zelf gesjreve hej. 't Woor d'r ènne dae bleef hange. Ónger 't köpke "buitenlandse komaf en correct taalgebruik" , sjreef Aleid Truijens euver de verangeringe die ós Nederlands gaondjeweg óngergeit. Bie ein gezeumerdj sjtónge ze op 'n rieke, de opgekropdje irritaties nao 'n paar daag Jinek kieke.

Ein zin wil ich uch neet ónthaoje: "lidwäörd, aanwiezendje en betrèkkelike veurnaamwäörd ónthulle genadeloeës det emes, wie lang ouch in Nederlandj en wie groeët ziene waordesjat den ouch, gènne modertaalsjpraeker is". Euver 't verdwiene van 't lidwaord 'het' , höb ich hie al 'ns eder gesjreve. 't Verkieërdj gebroek van betrèkkelike veurnaamwäördjes aevel is get waat mich al lang opvèltj, aeve lang sjtuuërtj en det waarsjienlik mien laevelank blief doon. En det terwiel 't ougesjienlik zoeë mekkelik is: 't maedje 'det' , de jóng 'dae' , de köppelkes 'die' .

Wie gezagdj, de column woor d'r eine dae bleef hange. De ganse waek al loester ich mit anger oeëre nao alles waat aan wäörd op radio en televisie binnekumtj. Ieës nog mit pen en papier inne buurt, mer d'r woor al sjnel gèn beginne mieër aan. 't Liektj waal besjmèttelik, 't begintj epidemische vörmkes te kriege. Ouch gebaore en getaoge modertaliste gaon regelmaotig euver de sjreef. Wie gezagdj, ich hej 't gaer zelf gesjreve. V'r kinne ós landjgenoeëte van boetelandse kómaaf den waal de sjuldj gaeve van gèn correc taalgebroek, mer waat vèltj häör te verwiete es ze oplèttendj loestere nao emes van binnelandse kómaaf en 't veurbeeldj 'det dae die' aanreiktj.

© jan sjure, 20 februari 2015