trök nao: "columns"

kwakkellente

Es ich allewiel miene mobiele telefoon aanzèt, luuëtj 't zich op 't sjtartsjermke zeen waat veur waer 't is in Lin. Gèn idee wie ich d'raan kóm. 't Meldje zich 'ns óngevraogdj sjtuuërendj aan en kumtj 'n paar keer per daag aeve óngevraogdj en nog irritanter trök. Es ich dit sjrief kin ich binne zeen det 't boete veer grade is en det die veer veule wie drie. Ich mót aan mien broor dinke dae, wie destieds de nuutste telefoons oppe mert kome, in 'n gezelsjap sjtóng van sjtrónsendje sjermsjpiensers. Hae leet zien horloge zeen. Die kós 'm väöl goodkouper verduutsje waat veur waer 't woor. Hae hoofdje ziene erm mer boete de deur te haoje. Es 't klökske naat wurtj, raegentj 't.

D'r is ein bladzie inne gezèt die ich gemeinlik euversjlaon. Ich sjaak neet, ich dam neet en waat veur waer 't guftj, och ich zeen 't waal. Gistermörge kós ich 't aevel neet laote. 't Limburgs landkaertje woor bezejdj mit raegewölkskes, 't kaertje van Nederlandj d'r naeve leet neet väöl anges zeen en de viefdaagse verwachting goof vief daag dröppelendje ieëlenj. Zónjig is de ieëste daag vanne meteorologische lente en es de waerdames en -men d'r neet naeve zitte, begintj dae aeve kwakkelendj es wie de wintjer ós adieje wunsj.

Miene haop is gevestigdj oppe astronomische lente. Laot de metereologe mer lulle, de lente begintj op 20 mieërt óm 23:45 oer. Euver drie waeke guftj de natuur waal aan det 't zoeë wied is. De zón kumtj den pas richtig ózze kantj op. 't Lentezunke bepaoltj waal wienieë v'r d'n haof in kinne gaon, de fietse oppómpe, de wintjerjes oprume. Toet den is 't nog aeve kwakkelwintjer. Haopelik kriege v'r gènne astronomische kwakkellente.

© jan sjure, 27 februari 2015