trök nao: "columns"

de maot genómme

In Thoeër, Papenhaove en Waobich numme z'n 'm 'Jan' , in Gelaen 'Jantje' . In Werment wurtj d'r vertroetelendj mit 'Sjangske' aangesjpraoke. In Belvend hètj d'r 'Willem' en in Mestreech 'Wum' . Zoeë mer get vanne twelf veurname die ich taegekoom in deil drie van 't Waordebook vanne Limburgse Dialekte. Twelf veurname in 'n lieske van 152 oetdrökkinge veur 't apparaat det inne vakliteratuur 'penis' wurtj genumdj. In die opsomming koom ich d'r hieël get taege die zoeëmer 'n aanwiezing zówwe kinne zeen veur wie hie plaatselik nao de gruuëdje van 't mannelik lid wurtj gekeke.

Zoeë kome de samesjtèllers in Zjwame dök 'kleine' taege, in Tegele en Lötterao 'kleine jóng', in Thoeër en Wieërt wórt 'menneke' väol gehuuërdj, in Postert 'pieleke' en in Mael höbbe z'n 't euver 'n 'pinneke' . Brach haet 'n 'pismenke' wo ze in Häör en Neel 'piezemenke' taege zègke. Allemaol name die neet getuge van ech väol zelfvertroewe. Vergeliektj die name 'ns mit 't Remunjse 'sjtang' , 't Belvendse 'wuiles' , 't Vielese 'knöppel' , 't Waobichse 'nónk' of de 'paotsjtek' oet Herte. Wäörd die get oetsjtraole, wäörd veur gerei wo se gaer 'geer' taege zaes.

't Maaktj aevel neet oet, 't is allemaol achterhaoldj. Of 't dingske of dink noe 'ieverpees', 'sjlaagwerk', 'boekloetsj, 'sjtäönder' of 'hengerke', 'vaansjtek', 'veugelke', 'diekmaeker', 'sjtumpke', 'tap', 'pummelke', 'piemel' of 'piemelke' hètj, 't haet mit lingdje of diekdje gaaroet nieks van doon. Wie v'r 'häöm' hie ouch numme, de 'penis' is geweun hieël gemiddeldj. Brits óngerzeuk tuuëndje det aan op basis van 15.521 opgemaete hangendje en sjtäöndje 'plassertjes'. Ónger de titel 'bön ich normaal?' versjene de resultate dis waek in 'n gerenomeerdj urologetiedsjrif. Ich zów waal 'ns wille wete wieväöl mansluuj woonsdigmörge halverwaeges de gezèt oet de boeks zeen gegange en zich de maot höbbe genómme of höbbe laote numme.

© jan sjure, 6 mieërt 2015