trök nao: "columns"

zinge

De zin beteikentj hieëlemaol nieks, mer es v'r: 'moder sjultj 't paerd oet veur hennep', zówwe vertale in 't Chinees en ze mit ós alfabet zówwe oetsjrieve, sjtuit d'r: 'ma ma ma ma'. 't Chinees haet 'ne betrèkkelik kleine veurraod einlettergrepige wäördjes mer door die wäördjes op versjillendje toeënhuuëgdje anges oet te sjpraeke, kin 'ne Chinees mit 'n klein aantal alfabetisch oetgesjreve wäörd 't zelfdje zègke waat in idder anger taal gezagdj kin waere. Ós Limburgs haet neet zoeë väöl mer ouch get van die unieke trèkskes.

'n Paar waeke gelege wórt 't Jaorbook 2014 van Veldeke Limburg gepresenteerdj. Neet allein de locatie, 'n sfeervol kesjtieël in Grathem, en d'n aovendj zelf, ouch en hieëlemaol 't book wo 't allemaol óm drejdje móch d'r zeen. Wie 't zich leet aanzeen weer väöl euver ós taal in dit jaorbook. Ein artikel höb ich mit bezónjer väöl plezeer gelaeze. 't Sjprook 't mich veural aan es jónge opa van vief kleinkinjer wovan de aodste net drie is gewaore. Vief kleinkinjer die zich 'n prachtige taal aan 't eige make zeen. 'n Artikel euver 't 'lexicaal toeëncontras', in geweun wäörd euver de versjille die v'r aan wäörd gaeve door ze op 'n anger toeën oet te sjpraeke.

Wie Limburgse kiendjes lieëre 'zinge'. De titel van 't artikel sjpriktj bookdeile. 't Hanjeltj euver 'n óngerzeuk ónger Limburgse baby's en peuters, zègk mer kinjer inne laeftied van mien vief kleinkinjer. Dao wils se es jónge opa mit neet allein hieël get leefdje inne prie veur vief sjoeën ougeppelkes, mer onnag 'ns veur alles waat mit ós taal van doon haet, 't naodje vanne sök van oetpluze. V'r mótte nog 'n jaor of twieë oppe resultate wachte. Toet daen tied gaon ich geweun zingentaere mit vief boeksebäömkes ane sjlaag.

© jan sjure, 13 mieërt 2015

Höbtj g'r nao 't laeze van dizze column interesse gekrege in 't óngerzeuk,
en höbtj g'r 'n kiendje (of 'n kleinkindj) tösse de 0 of 2,5 jaor,
of verwachtj g'r nog 'n kiendje?
Good nuuts: g'r kintj nog aan 't óngerzeuk mitdoon.
Es g'r op 't plaetje hie-ónger kliktj kriegtj g'r alle informatie in 'n apaart pdf-ke.