trök nao: "columns"

mieër, mieër, mieër

Es of 't lanjelike verkezinge wore woonsdigaovendj, es of 't allein mer ómme Ieëste Kamer ging. D'r woor bekans allein mer aandach veur de wiejer versjnippering vanne lanjelike politiek. Ich zoog alle partiebónze veurbiekómme, d'r woor mer weinig aandach veur waat ich sjmörges op 't sjtumbiljet hej kinne laeze. Ich hej d'n eigeste woonsdigmörge toch ech 'n hökske roeëd moge make naeve de naam van emes dae ich gaer 'n sjteulke zów gaeve inne Provincaal Sjtaote.

't Is natuurlik allemaol väöl interessanter óm te filosofere euver de grótter misère die is óntsjtange nao 't pak sjlaeg det de coalitie ómme oeëre kreeg, mer in 'n aantal provincies is waal degelik 't ein en anger verangerdj. In idder landjsdeil woor de PvdA de bók dae de meiste zunj kreeg toegesjaove. Ouch de VVD deej dao aan mit, mer de groeëte leider leet es gruuëtsje premier wete det hae nog sjteeds 't grótste deil hej binnegehaoldj. Waarsjienlik hej d'r de oetsjlaag van Remunj nog neet gezeen. Dao hej de Volkspartie Limburg duchtig hoes gehaoje. Van nieks nao nummer ein en daomit wórt de VVD van 't Remunjs tonieël gevaegdj. 't Levertj de debutant oeteindelik toch mer eine zetel op. 't Zal mich benuje waem d'r op geit zitte.

Opvallendj woor ouch weer de lieëg opkoms. Inne ganse provincie haet zich nog gèn 45% de meujte getruuësj óm te gaon sjtumme. 't Meis in 't oug sjpringendj woor aevel 't haopgaevendje verlees van de kompane van Wilders. Wo ze in vurrige verkezinge bie ós nog fier aan kop ginge, móste ze noe 't CDA veur laote gaon. Wo 't 'minder, minder, minder' waarsjienlik get ouge haet doon äöpene, zów 't toch veural sjoeën gewaes es get 'mieër, mieër, mieër' hökskes roeëd wore gemaaktj.

© jan sjure, 20 mieërt 2015