trök nao: "columns"

van die daag

D'r zeen van die daag det se mèrks det se get aojer wurs. Neet det ich mich noe ech aod veul mer ze kómme sjteeds dökker. Die daag det es se nao 'n paar uurkes inne häöf maore blie bös det se mit 'n book en de bein ómhoeëg in 'ne luie sjtool in sjlaop tumels. Die daag det se neet mieër alles gedaon kriegs waat se dich sjmörges höbs veurgenómme. Die daag det se dich saoves 'n frietje haols es de aerpel, de oje en de moere al gesjèldj zeen. Van die daag det se mèrks det 'n dieke zèstig jaor al get sjpäör achter laote.

Zoeë'ne daag hej ich woonsdig. Ich hej hieël get wille doon, mer wie 't waer nao twieë gezètte d'r nog neet väöl baeter op woor gewaore, höb ich mich mer 'n good book en ónger 't motto: "de gries celle mótte ouch häör training höbbe", 't d'r mer 'ns van gepaktj. D'r mer geweun 'ne daag van gemaakt wo-op de boel de boel móch blieve. Veur saoves hej ich zoeëwiezoeë nog 'n paar kaertjes ligke veur aeve trök nao d'n tied det alles nog van eiges ging.

Lenny Kuhr is van miene laeftied en wie 't bezóng det 't gèn zestieën mieër woor, zoeëgaar neet mieër die vieërtiger van doe, goof mich det 'n good geveul. Wie aeve later ónger prachtige begeleiding 'n teks van Rikkert Zuiderveld veurbiekoom, hej ich neet väöl mieër mieër nuuëdig: "v'r höbbe nog get jaore veur de boeg en de beste daag kinne nog waal kómme". Soms höbs se zoeë'n leedje 'ns nuuëdig. D'r kómme nog genóg van die daag det se mèrks det se get aojer wurs, mer de bèste zówwe dao zoeëmer 'ns tösse kinne zitte.

© jan sjure, 27 mieërt 2015