trök nao: "columns"

greun & gael

Ich höb alweer 'n paar jaor 'n greun-gael logo op mien bankpeske sjtaon. Ich höb d'r mien door de jaore haer bie-eingesjörgdje sjpaarcente sjtaon en los van 't feit det mich det bekans nieks mieër oplevertj, höb ich d'r eigelik nieks negatiefs euver te melje. 't Bankiere euver internet is d'r, zoeë wied ich det kin beoordele, veilig geregeldj en zoeë mekkelik det ich neet mieër zónger zów kinne. Es ich nog 'ns mót pinne of örges mit mien peske aafraeken, zörg ich altied det mich nemes oppe vingers kiektj.

De lèste waek is dao ónbewusj de behoefte biegekómme óm ouch 't oet mien beurs haole van mien bankpeske veur de boetewaereld aaf te sjerme. Ich zów mich greun en gael sjame es emes zów kinne zeen det ich 'n greun-gael peske gebroek. Ich wil 't zoeëgaar veur michzelf al neet mieër wete det ich mien zake doon mit 'n bank wo ich gaar nieks mieër mit van doon wil höbbe. Vanne waek höb ich mich 'n nuuj raekeningnummer aangevraogdj bie 'n bank die mich 'n get baeter geveul guftj.

Wied vanne grajers, wied van belachelike loeënsverhuuëginge, wied van d'n ónzin wo alles mit rech wórt gebreidj. Wied van alles wo ich mich greun en gael aan erger. Zalm en zien zjwaor euverbetaaldje compane gaon aeve trök nao aaf en wille weer rös en vertroewe. Laot det lèste noe net det zeen waat ich ouch zeuk bie 'n bank die ich mit 'n gerösj hert mien bank wil kinne numme. 't Zal mich óngetwiefeldj 'n groeët plezeer zeen es ich euver 'n paar daag alles waat ouch mer inne wiedste verte aan greun-gael bankiere duit dinke, achter mich kin laote. Van mich moog gans greun-gael bankierendj Nederlandj zoeë'n geveul höbbe.

© jan sjure, 3 april 2015