trök nao: "columns"

laot gaon, laot gaon

Vurrige waek sjreef ich hie euver mien greun-gael ergernisse en mien verheuge op 'n aansjtäöndj nuuj bankpeske. 't Lèste höb ich nog neet, waal höb ich al mien nuuj raekeningnummer en 't goof inderdaad 'n good geveul wie ich d'r veur de ieëste keer get geldj haer kós sjuve. Mien greun aevel is daonao allein mer greunder, mien gael allein mer gaelder gewaore.

Dinsdig móchte v'r in 'n huuërzitting 'ns tegooj kinnismake mit Rik baron van Slingelandt, de president-commissaris van de greun-gael bank. Ich höb drie keer mótte loestere nao zien gesjtuntel en kós mien oeëre nog neet geluive wie ich 'm huuërdje oetlègke det de politiek 't mer neet kin bevatte det d'r noe einmaol gèn meuderke leef aan hulptj det de huuëgdje vanne salarisse aafhankelik is vanne arbeidsmert. Groeëte greujendje zek geldj zeen volges dit werreldvraemdj waeze bliekbaar de insigste meneer óm capabel financieel-economisch doorgewintjerdj bancair talent inne raod van besjtuur te kriege en te haoje.

Get later bie Pauw woor d'r bekans vanzelfsjpraekendj de nuuëdige aandach veur de huuërzitting. Ane discussie móchte get sjtudente vanne Erasmus Universiteit en Nijenrode aansjuve. Toekomstige bankiers die häör meining móchte ventilere. De argumente die ze inbrachte deje mich bekans oet miene sjtool valle. Ein corpsbelke leet wete zich d'r euver te verwónjere det de politiek d'r nog sjteeds nieks van sjnaptj en zoeë weinig begrip haet veur de bankiers. 'n Anger belke vónj 't belachelik det de greun-gael bank de salarisverhuuëginge sjteeds mer opnuuj mós blieve oetlègke. 'n Aantal belkes zów nao London verhoeze es dao mieër te graje vèltj. Es dit 't capabel financieel-economisch doorgewintjerdj bancair talent is wo v'r 't dalik mit mótte gaon doon, kin ich mer ein dink concludere: laot gaon, laot gaon.

© jan sjure, 10 april 2015