trök nao: "columns"

lectus, lavacrum et panem

In ós allerieëste ieëw laefdje de Romeinse dichter Juvenalis. Hae is bekindj gewaore door zien zèstieën satires wo-in hae kwistig kritiek sjpoot op de mach en 't opnoom veur de zjwakere oet de destiedse samelaeving. Inne tieëndje, dae hae róndj 't jaor hóngerd mót höbbe gesjreve, sjtuit 't legendarische "panem et circences". Gaef 't volk "broead en sjpele" en d'r is rös inne boet. Ich vraog mich aaf waat hae vandaag d'n daag zów höbbe gesjreve. Mesjien zów 'ne zevetieëndje satire waal euver "lectus, lavacrum et panem" höbbe verhanjeldj.

Lectus, lavacrum et panem, in geweun Limburgs: bèd, bad en broeëd. De allerminste behoeftes die 'ne miens nuuëdig haet. En of dae miens noe de sjtempel illegaal, asielzeuker of oetgeprocedeerdj mitdruuëgtj, 't zów eigelik neet oet moge make. De groep van hóngerd mit alledrie die sjtempels oppe kraomenak, nomadeertj in Amsterdam al 'n paar jaor ónger de naam "veer zeen hie". V'r höbbe d'r get nuuj wäörd biegekrege: vluchkèrk, vluchflat, vluchpark, vluchkantoeër, vluchhave, vluchgarage, vluchmert. 't College veur de Rechte vanne Miens sjpriktj euver miensónwaerdig en de regeringspartieje höbbe zich inne haor.

Woonsdignach kreeg 't volk zien "circences", zien "sjpele". 't Torentje van Rutte wórt GladiaTorentje. De sjtandjpuntje van VVD en PvdA zeen nao de recente verkezinge gesjlepe. 't Eige gezich mót weer zichbaar zeen, d'r mót sjerper geprofileerdj waere en och, es 't mót, desnoeëds euver de köp van get asielzeukers die óm waat veur reje den ouch neet trögkes nao häöre gebaortegróndj kinne. De partieje sjtechele euver wie 'ne oetsjpraok oet Sjtraatsburg geïnterpreteerdj mót waere. 'n Paar kilomaeter wiejerobbes trotsere luuj de nachtelike lentekaoj. Mienselikheid is wied te zeuke. "Lectus, lavacrum et panem". Moog d'r nog 'n bietje "domus" bie. Get hoeselikheid.

© jan sjure, 17 april 2015