trök nao: "columns"

raar lendje

Waat laeve v'r toch in 'n raar lendje. Vurrige waek kóste v'r d'r nog getuge van zeen det ós half keuninklik gezelsjap 'n modern vertaling óngerteikendje van de notule vanne Ieëste Vrie Sjtaotevergadering van 1572. In det document leet zich ónger angere laeze det vrieheid en tolerantie de basiswaerd zeen die bie Nederlandj huuëre. Get wo v'r mit rech gruuëtsj op kinne zeen. 't Wórt dees waek den ouch terech weer herdachtj. Nöt, ón- en raegewaer haoje ós dao neet van aaf. Inne eigeste waek wurtj emes vervolgdj dae 'Fuck de koning' haet gerope.

Ós vrieheid wurtj bliekbaar neet altied gewaardeerdj. Zjwarte Piet bie ziene naam numme, levertj hieël get discussies op. De bóndj taege 't vloke is al jaore behuuërlik actief en probeertj ónger 't motto God Ziene Naam is heilig, ós taalgebroek 'n bietje op te sjuuëne. Luuj die 'n anger geluif aanhange, sjtuuëre zich d'r aeve terech aan es det wo zie in geluive wurtj beledigdj. Mer naodet op 1 februari 2014 't verbod op godslastering wórt opgehaeve, moog 't allemaol in ós vrie raar lendje.

In get anger gevalle ligktj die vrieheid waal wèttelik aan benj. Oprope toet geweld en haat zejje zeen nog sjteeds sjtraofbaar. V'r moge 'ne ambtenieër in functie neet beledige en veur 'n opzèttelike belediging van ózze keuning of zien vrouw, kins se mer leefs vief jaor opgesjlaote waere. Ich sjnap 't allemaol neet gans mieër. Zoeë is d'r neet ein haor op miene kop die d'r ouch mer 'n krot van sjnaptj det emes van ós zich gepaerskeuteldj veultj es d'r gassjpraeker moog zeen bie de priesoetreiking veur waem 'ne profeet 't bèste kin beledige. 'Fuck Wilders' zów ich bekans wille rope. Zoeë bön ich aevel neet opgevoedj in det raar lendje van ós.

© jan sjure, 8 mei 2015