trök nao: "columns"

't euverzich

De koste veur de zörg blieve mer oploupe. Nuuj keihel ciefers van 't Centraal Bureau veur ózze Sjtatistiek lete ós det gister zeen. Mit 95 miljard woor vurrig jaor alles waat v'r nuuëdig höbbe óm zoeë gezóndj wie ós leef is door 't laeve te gaon, 1,8 % duurder es 't jaor daoveur. Mit alles waat Rutte en consorte zich oetgefiespernuldj höbbe óm wo mer meugelik minder oet te gaeve, mót det 'ne behuuërlike taegevaller zeen. De NBA, de beroepsvereniging van Nederlandse accountants, deej d'r 'n sjöpke baovenop en leet wete det 't gaondjeweg zoeë'n zooitje is gewaore in 't oerwoud van regels en instanties, det nemes mieër precies wètj wo regels euver gaon of wo ze überhaupt veur bedoeldj zeen. De bureaucratische chaos sjlurptj väöls te väöl tied en daomit klawwe vol geldj.

De media sjtaon vol berichte euver neet functionerendje PGB-oetbetalinge. De sjtaotssecretaris guftj aan det alles op zien puuëtjes terech aan 't kómme is. Ós Raekenkamer luuëtj aevel wete det neet allein 't Ministerie mer ouch 't oetveurendje SVB behuuërlike sjteke laote valle. De oppositie sjtèlt 't debat euver de PGB-problematiek oet ómdet ze zich wiejer inne näödjes vanne materie wille verdepe.

't Liektj of hieël den Haag neet allein de regie en de waeg, mer 't hieël euverzich inne zörg kwiet is. Ieëgister sjtóng 't relaas van 'ne bezörgdje hulpverlener oet 'n verpleeghoes inne gezèt. 't Köpke: 'ich ren mich de blubber en ich red 't neet', hej in aevemin wäörd ouch zoeëmer de samevatting kinne zeen van alles waat de politiek zich aan zörgmaotregele bie-ein zeumertj. Ze probere van alles en 't löktj mer neet. Es v'r d'r mit z'n alle neet zoeë pienlik de dupe van wore, zów 't óm te bäöke van 't lache zeen.

© jan sjure, 22 mei 2015