trök nao: "columns"

versjil mót d'r zeen

Zeuk de tieën versjille, vreuger vónj ich 't 'n leuk puzzelke. Gemeinlik wore 't twieë teikeninge naevenein wo-op ane eine kantj eine appel mieër aan de boum hóng of wo 'n kat op 't ein plaetje mit twieë en op 't anger mit drie sjnorhaore woor aafgebeeldj. Ich höb hieël get kruutskes gezatj bie aeveväöl aafwiekinge. Gistermörge höb ich 't sjpelke nog 'ns gesjpeeldj. Zeuk de versjille in twieë gezèttefoto's.

De ieëste sjtóng oppe veurpagina van dees gezèt, de foto vanne aanhaojing van 'n oet zien bèd gehaoldj kopsjtök van motorclub Bandidos. Mit groeët vertuuën van mach en ónger aanwezigheid vanne media wórt hae geblindeerdj, berves en in zien óngerboeks aafgeveurdj. 't Twieëdje plaetje sjtóng gister inne Volkskrant. Ouch in Zürich wórte get luuj van häör bèd gelichtj. 'n Lake tösse de deur van 't hotel en de auto wo-in eine vanne verdachte wórt aafgeveurdj heel de media op aafsjtandj. Ónger 't lake zeen nog net de blinkendj gepoetsdje sjoon vanne meugelike crimineel te zeen. Alles bie-eintèllendj koom ich op hieël get mieër es tieën versjille.

Es ich kiek nao waat neet oppe foto's te zeen is, wurtj 't versjil waal hieël groeët. Neet det ich get wil goodkalle waat meugelik door de aangehaoje Bandidos zów zeen oetgevraete, mer nao waat de lèste tied veur 'ne rottigheid euver de FIFA nao boete kumtj, hejje ze d'r van mich nog hieël get mieër oet 't Zjwitsers hotel moge haole. Mer versjil mót d'r zeen. Oppe foto van oppe Nuujsjtad hej ich neet drek witte bäördjes verwachtj. Mer egaal waat hae ouch oppe kerfsjtek moog höbbe, 't woor waal zoeë netjes gewaes häöm geweun hieël aeve get tied gegundj te höbbe óm zich 'n boeks en 'n paar sjoon aan te trèkke. Al woor 't mer veur de foto gewaes.

© jan sjure, 29 mei 2015