trök nao: "columns"

bótter

Bótterberg, ich höb 't waord al jaore neet mieër gehuuërdj. 't Mót óntsjtange zeen in d'n tied det v'r nog 'n EEG hejje. Berg bótter wórte inne jaore zevetig vanne vurrige ieëw opgesjlage in keulhoezer en boere kóste zoeëväöl bótter levere es ze mer wólle. 't Landjboewbeleid oet daen tied zörgdje veur 'ne gegarandeerdje opbrings. Dis waek koom 't waord van örges deep in mien geheuge weer baovedrieve. De berg bótter die op God moog wete wieväöl köp is oetgesjmeerdj, is gaondjeweg zoeë hoeëg gewaore det 't allemaol waal hieël óneuverzichtelik begintj te waere.

Waat is neet allemaol veurbie gekómme aafgeloupe waeke? V'r kóste gèn gezèt mieër aopesjlaon, gènne radio of televisie mieër aanzètte, of de bótter koom ós taege. De bótter oppe köp van FIFA-bónze, wovan de meiste voetballendj nog gènne deuk in 'n pekske bótter trappe. De bótter oppe köp vanne NS-kopsjtökke die volop inne misère vanne gunning van 't Limburgs aopenbaar verveur waere mitgesjleurdj. De bótter oppe köp van 't Vinloos college noe alle leuges róndj Villa Flora baove water kómme drieve. De bótter oppe kop van van Rijn dae waal hieël creatief is ómgegange mit de cieferkes vanne zörgbudgette.

Kiektj 'ns nao die zörg. In 2013 wórt wèttelik vasgelagdj det zörgbesjtuurders neet mieër moge verdene den ózze minister-president. Toch blieve ze geweun mit häör naze inne bótter valle. Gister kóste v'r laeze det vurrig jaor nog sjteeds 152 topmen mit mieër es Rutte op heim aan zeen gegange. 't Blieftj mich verwónjere det ze zich óngerein de henj baove de köp kinne blieve haoje. Baove köp die toet wied euver die eigeste naze ónger de bótter zitte. En es d'r 'ns gesjmeerdj wurtj, liektj 't hoeëgoet get bótter ane galg oppe bótterberg.

© jan sjure, 5 juni 2015