trök nao: "columns"

op en aaf

Es se örges good mit oppe huuëgdje wils blieve van waat ónger de luuj laeftj, dan zeen 't waal de ingezónje breve van laezers. Dök luuës se get en kins se d'r gif op innumme det d'r op gereageerdj geit waere. Inne Horizon van aafgeloupe zaoterdig probeerdje Guus Urlings ós alvas 'n bietje op te werme veur de negetigste verjäördig van Veldeke Limburg dae volgendj jaor gevierdj geit waere. De vereniging die, wie v'r in 't ónvervalsj Mestreechs van 1926 kóste laeze, veuriers wórt opgerichtj toet insjtandjhaoje en bevordere vanne Limburgse Dialecte.

Ein citaat oet det artikel gaajdje mich waal. "Wie vaster de sjpelling van 'n taol in häör sjeun steit, wie groeter de kans van häör veurtbestaon is, wie groeter de kans, datse door latere geslachte onvervals zal weurde euvergenomme en in iere gehawwe" . 'n Oetsjpraok oet 1929 van doezendjpoeët en aod-Veldekeveurzitter Edmond Jaspar. In de negetig jaor die Veldeke Limburg besjtuit is väöl gesjtraeveldj en nog mieër gesjtecheldj. Döks ging 't daobie euver de sjpelling. In die bekans negetig jaor is 't de vereniging aevel neet ech gelöktj óm die sjpelling tegooj en sjtevig 'inne sjeun' te kriege. Sjterker nog, ze banjertj nog sjteeds op bervese veut door ós brónsgreun eikehout. Heuvel op, heuvel aaf.

Vandaag hej ich d'r get euver wille sjrieve. Ieëgister aevel loos ich 'ne ingezónje breef oet Cincinatti, Ohio. De dao verblievendje Paula Turcotte sjtuuërdje zich aan drie wäördjes in 't artikel. Hae sjreef den waal 'zoeë wie det hètj', mer de 'ups and downs', die Guus gebroekdje óm de gesjiedenis van Veldeke same te vatte, vele aevegood neet in goje aerd in de Ingelstalige gróndj. Negetig jaor insjtandjhaoje vanne Limburgse taal wórte gevange in drie Ingelse wäördjes. 'ne Ingezónje breef nao mien hert.

© jan sjure, 12 juni 2015