trök nao: "columns"

twieë kieër 'jao'

D'r zeen van die daag die op 't huuske de kalender haole. Daag die se es bekans vanzelfsjpraekendj neet vergits, mer die se d'r toch mer opsjriefs veur 't geval det 't geheuge neet mieër is waat 't oeëts gewaes is. Vandaag is zoeë'ne daag. Ich kreeg al 'ns 'n dochter, 'ne zoon en vief kleinkinjer, vandaag kumtj dao hieël officieel 'n sjoeëndochter bie. Häöre verjäördig sjtuit al 'n paar jaor oppe kalender, ze is neet veur nieks de moder van twieë van mien drie prachtige kleindochters. Vandaag kumtj ze d'r same mit miene zoon nog 'ns op, netjes naevenein mit 'n paar ringskes d'r tösse en 't anno Domini d'r achteraan.

'n Sjoeëndochter, vandaag wurtj 't allemaol pas ech. Vanmiddig waere jao-wäörd gewisseldj en bezegeldj mit 'n ieëste veurzichtig muulke tösse 'ne man en 'n vrouw die vanaaf det moment es ech paar wiejer gaon. Ich hej 't neet sjónder kinne zègke es wie de twieë opa-janzègkerkes 't deje in 't gedichske det in ónvervalsj Limburgs oppe trouwkaart sjtóng: "De naam Sjure woor aan ós al gegaeve, noe kriegtj mama 'm ouch veur de res van häör laeve" .

Mit de ós aangezagdje zèstieën grade en raege, geit vandaag neet de beuk in es dae 19dje juni 2015 wo-op 't zoeë 'n sjoeën waer woor. Hae zal det aevel waal doon es d'n daag det ich d'r 'n sjoeëndochter biekreeg. Oppe kalender op 't huuske wurtj hae vannach in sierlike letters biegesjreve. Waem wètj wie 't d'r euver get jaore van noe mit mien al get naolaotendj geheuge oetzuutj. Ich haop d'r nog jaore aan herinnerdj te moge waere. 't Rotwaer det ós vandaag te wachte sjtuit, och det zeen v'r volgendje waek alweer vergaete. Twieë kieeër 'jao' is wo 't vandaag óm drejtj.

© jan sjure, 19 juni 2015