trök nao: "columns"

aanzuuëtere

Gemeinlik kin ich in groeëte liene volge wie 't eint en anger inein sjtiktj. De renner dae zich zaoterdig 't rapste 14 kilomaeter door en róndj Utrech zwètj, kriegtj d'n ieëste gaele trui van dit jaor. Es zunjig 'n bölke wurtj gemisj, moge de sjötte nao d'n tap. Döks aevel wurtj 't alles op 'n rieke kriege get lestiger. Wo half Nederlandj zich inne zomer in 't ein of anger werm landj zón en hèts opzeuktj, klage v'r alle sjtein en bein die v'r mer kinne vinje bie-ein es 't hie 'ns baove de dertig oetkumtj.

Gans lestig wurtj mich 't begriepe gemaaktj door de politiek. Ich dach det ich altied 'n redelik good idee hej van waat oetdrökkinge beteikene wie: 'n lèste kans, vief veur twelf, 'n ultimatum en zoeëgaar God wètj bekans neet waat Hae de aafgeloupe waeke nog mieër aan superlatief gewazel veurbie haet zeen en huuëre kómme. Es of 't allemaol nieks kosj, wurtj d'r mer get aangezuuëterdj en sjtaon die erm Grieke vol inne zón behuuërlik inne kaoj.

Mesjien mótte v'r in Europa mer 'ns 'n referendum gaon haoje of de Grieke noe waal of neet 'n referendum zówwe mótte kinne haoje mit de vraog of in de res van Europa 'n referendum gehaoje zów moge kinne waere. De gelieërdje in Brussel mótte zich de kómmendje maondje mer 'ns oetfiespernulle wo det referendum den weer euver zów mótte kinne gaon. Ein dink wurtj daobie gaondjeweg dudelik, 't mót gaon euver 'n sumpel vraog. Eint die geweun mit 'n sumpel 'jao' of 'nae' beantjwaordj zów mótte kinne waere. 't Zów anges meugelik 'ns allemaol väöls te óndoorzichtig kinne zeen veur d'n eine of d'n angere gewuuëne burger dae mit 'n bietje gezónd boereversjtandj 't aanzuuëtere probeertj bie te haoje.

© jan sjure, 3 juli 2015