trök nao: "columns"

kepotte lien

Jaore geleje alweer sjreef ich hie det ich mien dochter klam kós volge wie ze mich vertèldje det 't nog 'n 'kepotte lien' mós haole. Ich sjreef det ómdet ich mich destieds in häör ouge net get te väöl en net get te dök hej oetgelaote euver 't in mien ouge sjtuuërendj te pas en te ónpas tsunamisch gebroek van Ingelse wäörd in ós Nederlandse en Limburgse taal. Ze hej mich good begrepe en wól mich 'n leske lieëre en meej belieërendj 't waord 'deadline'. Op mien beurt hej ich häöm weer begrepe en kós d'r wie 't kwartje veel waal óm lache.

'Deadline', 'n waord womit v'r allewiel doeëdgesjmete waere. 'n Waord aevel ouch det toet veur kort neet lestig te begriepe veel. Vurrige waek sjreef ich det ich 't aangezuuëter vanne politiek neet mieër kós volge. Det ich de nuuj beteikenisse van oetdrökkinge wie lèste kans, vief veur twelf of ultimatum neet mieër begreep. De aafgeloupe waek is det geveul allein mer gegreujdj. Mien begriepe luuëtj sjteeds mieër nao. Waat is 'n democratisch 'nae' nog waerd? Ich kin 't neet mieër volge. Zónjig is d'r weer mer 'ns 'n deadline. 't Sjientj dis kieër den toch ech de alderlèste te zeen. 't Zal mich benuje waat veur lien daonao gesjpanne wurtj.

Mien moder van 96 goof mich gister veer wäördjes wiesheid mit die bleve hange: "aovendj wurtj 't altied". 'n Sjónder deadline kós ich mich neet bedinke. Egaal waat de kómmendje daag ouch mit de euro, Europa of de Grieke geit gebeure, de dagelikse deadline van aovendj waere zal zich toet in lingdje van daag weer aan blieve dene. Egaal waat zónjig gebeurtj, es 't duuster wurtj briktj geweun weer 'ne nuje aovendj aan. 't Zal maondig neet anges zeen.

© jan sjure, 10 juli 2015