trök nao: "columns"

apeneutjes

Gans waarsjienlik zeen d'r van die daag det 't neet zoeë is, mer sjtèltj noe 'ns det g'r vandaag € 13.921,00 in eur vottetes zówtj höbbe. Laot ós wiejer 'ns aannumme det g'r mit det geldj oppe tes vanaovendj bie eur femilie zówtj zitte en emes van eur zösters, breurs, kinjer, aojers of num mer op, zów aeve neet zoeë good inne sjlappe was zitte en uch vraoge of g'r mesjien € 80,00 zówtj kinne misse. Mit det geldj zów zie of hae d'r weer aeve taegenaan kinne en 't inne toekoms get baeter kinne höbbe. Ich weit natuurlik neet waat g'r zówtj doon, mer höb zoeë'n dónkerbroen geveul det d'r ach tientjes van eigenieër gaon wissele. Op 't bedraag in eur vottetes zeen die tachtig euro, wie de Ingelse zègke, mer apeneutjes.

Es emes vanne femilie aevel veur de zoeëväölste kieër mit tachtig euro geholpe zów mótte waere, blieve 't allemaol nog sjteeds dezelfdje apeneutjes. Gans waarsjienlik zówtj g'r eur femilielid onnag 'ns op 'n anger meneer wille helpe den allein mer door geldj te blieve sjuve. G'r zówtj häöm of häör 'n bietje ane handj gaon haoje, 'ns wille wete wie hae of zie mit die apeneutjes ómgeit, g'r zówtj 'ns in zien of häör kasbeuk wille sjume, g'r zówtj get goje raod wille aandrage woróm 't bie uch waal en dao neet zoeë lekker löptj.

In 2014 woor 't bruto nationaal produc van Europa 13.921 miljard euro. Alles waat vurrig jaor aan waar en deenste wórt verdeendj, woor vurrig jaor dus 'ne behuuërlike sjmak geldj. Op dae sjmak duit 80, 85, 86 of nog 'n miljardje mieër of minder neet ech pien. Zoeë bekeke zeen 't eigelik mer apeneutjes die nuuëdig zeen óm Europa bie-ein en veilig te haoje.

© jan sjure, 17 juli 2015