trök nao: "columns"

LiLiLeid

Ingels is 'n sjoeën taal. 'n Taal die ich mich good eige höb kinne make. Ich höb oeëts veer jaor in Ingelandj moge sjtudere en twintjig jaor veur 'n Amerikaans bedrief gewèrktj. Toch höb ich 'ne hekel aan de veringelsing van mien modertaal. 't Duit d'r den aeve neet toe of 't mien Nederlands of mien Limburgs is. Gaondjeweg waere v'r doeëdgesjmete mit wäörd woveur veur aeveväöl 'n eigetalig alternatief veurhenj hej kinne zeen.

Ich kniep aevel 'ns noeëdgedwónge 'n uigske dich. Dis waek koom van versjillendje kenj 't berich det de LiLiLi-daag mit 'crowdfunding' geredj mót gaon waere. De provincie drejtj 't subsidiekraenke dich mit argumente die ich neet gans kin volge. Volges de Adviescommissie Cultuur van ós provincie zów de Sjtichting LiLiLi artistiek ónger de maot zeen. Verwónjerlik ómdet die eigeste Sjtichting al drie keer wórt genomineerdj veur de Cultuurpries van die eigeste provincie. Ouch wurtj es argument veur de aafwiezing genumdj det de kwaliteit van 't projec de lèste jaore is aafgenómme. Ich bön 't noeëts gewaar kinne waere.

Ich höb neet alle 17 veurgaondje LiLiLi-daag bezóchtj en veur de drie of veer die ich mós misse, woor altied waal 'n gooj reje. De 18dje en lèste, dae op 8 november inne ECI Cultuurfabriek gehaoje geit waere, sjtuit al in miene agenda gebeiteldj. 'Crowdfunding', in geweune miensekal 'n volksinzameling, veur 't jaorliks sjtreektaalfestival wo ich gaer aan mitdoon en mich d'r neet door laot sjaggernere det 't 'crowdfunding' genumdj wurtj. Es de benuuëdigdje 5.000 euro mer gehaoldj waere, moog de actie veur mien paart 'ne Franse, 'ne Duitse of zoeëgaar 'ne Griekse naam höbbe. Veldeke Limburg haet 2016 oetgerope toet 't Jaor vanne Limburgse Dialecte. Zónger LiLiLi-daag kriegtj 't LiLiLoeës jaor 'n zjwart rendje en geit 'crowdfunding' 't LiLiLeid veurluipig get verzaochte.

© jan sjure, 24 juli 2015