trök nao: "columns"

sjebuundere

Dis daag sjprook mich emes op sjtraot aan ómdet hae 'n Limburgs waord hej gehuuërdj det hae neet kós. Op bezeuk in Thoeër hej dao emes 'sjebuner' laote valle. Net wie hae, hej ich d'r noeëts van gehuuërdj. Volges häöm wórt d'r 'ne laegluiper mit bedoeldj. Waat is 't den mekkelik es se get waordebeuk inne kas höbs sjtaon. Inne waordebeuk van Thoeër en Tungelder vónj ich 'sjebuunder' veur 'ne vlaegel, emes dae gaer 'ns get sjtreke oethaoltj.

'n Sjoeën waord, aeve sjoeën es de sjtreke oet 'n verhaol det ich dis waek huuërdje en det oet 'n naoberdörp koom. 't Mót oet 'n gans gries verleje kómme, oet d'n tied det luuj nog wiste waat sjebuunders wore. Oet d'n tied det dörper nog bezejdj loge mit cafés. Oet d'n tied det se ze good hejs plekke, es se dich in idder kroeg in de sjtraot wo ich woon ein pilske drónks. Oet d'n tied det veur 'n knepke nog 'n glaeske beer wórt getaptj. Oet d'n tied det in 't neet wiejer te benumme naoberdörp twieë breurs twieë cafés dreve woveur se allein mer de sjtraot euver hoofdjes te sjtaeke.

Bie d'n eine broor woor bliekbaar neet hieël väöl te doon en hae ging mit 'n döbbeltje de sjtraot euver en besjtèldje zich bie d'n angere 'n pilske. Mit "doot dich d'r zelf ouch eine", begós 'ne sjoeëne aovendj. Wie de glazer laeg wore, sjtoke ze de sjtraot euver en de broor dae net 'n döbbeltje rieker woor, besjtèldje 't zelfdje. "Mich 'n pilske gaer en doot d'r dich zelf ouch eint". Hae raekendje aaf mit zien net verdeendje knepkes. Zoeë sjiene de sjebuunders 'ne gansen aovendj ane gang gewaes te zeen toet ze oeteindelik sjravelentaere häör bèdder höbbe gevónje.

© jan sjure, 31 juli 2015