trök nao: "columns"

ónthaoje

Mit mien geheuge is hieëlemaol nieks mis, ich kin mich zoeëgaar neet herinnere det ich 'ns oeëts get vergaete bön. 'n Argument det ich dis daag op leet drave wie aan mien geheuge wórt getwiefeldj. Van vreuger kin ich mich nog hieël get herinnere. Ich kin mien ieëste gironummer nog sjteeds oet de kop, al mót gezagdj waere det 't mekkelik zat woor in 'ne tied det 't nog mer zès cieferkes wore.

Allewiel höb ich gèn idee mieër waat mien bankraekeningnummers zeen. Veur alle zekerheid höb ich mien pincodes gecodeerdj in mien mobieltje sjtaon. Twieë bankpeskes en ein kredietkaart zeen net get teväöl veur mien hel sjief. Es emes mich mien mobiel telefoonnummer vruuëgtj, mót ich op mien kaertje kieke. Ómdet aezelsbrögkskes neet mieër helpe, höb ich mich 'n ganse lies van wachwäörd aangemaaktj. 't Is mich get väöl ónthaojes allemaol.

Óm gans zeker te zeen det ich nieks zów vergaete, hej ich mich 'n lieske gemaaktj wie ich vanne waek óm boeëdsjappe ging. De scanner goof 'n sjoeën bedraag aan wie ich mit 'n aafgelaje ker ane betaalautomaat sjtóng. Nog gèn tieën tèlle later leet zich laeze det ich 'n foute pincode hej ingetoetsj. Neet ech 'n probleem, woor 't neet det ich mien mobieltje woor vergaete. D'r zoot nieks anges op den trögkes op hoes aan. Mit alle begrip vanne werreld van 't maedje det mich daobie hólp, móch ich de vol ker aeve parkere. 'n Half uurke later mós ich 'm oetlègke det ich mien beurs woor vergaete. 't Woor nog sjteeds neet erg, 't mót aevel sjtevig getwiefeldj höbbe. Wie ich nao 'n oer eindelik mit mien ker nao boete leep, zag ich 'm nog det 't eigelik väöls te werm woor veur boeëdsjappe. 't Leverdje mich 'n alleszègkendj begriependj glimlechske op.

© jan sjure, 7 augustus 2015