trök nao: "columns"

was

Doe zóts 't mer veur de vot gesjörgdj kriege. Erger nog, doe zóts 't mer inne gezèt mótte laeze. Det se 'ne intrigant bös, 'ne manipulator mit sjterk narcistische trèkskes dae neet mit gezag euverwaeg kin en neet wètj te communicere. Det se daobie onnag 'ns neet wèts óm te gaon mit alles waat mit geldj van doon haet. Wie ich 't allemaol loos dis waek, kós ich eigelik allein mer cómplemente make veur de versjlaaggaever dae det allemaol oet de móndj van 'ne veurzitter wis te trèkke. Terech wórt den ouch gesjreve det dae goje man gaondjeweg 't interview ziene sjroom verloor.

De was ligktj op 't braed, d'r wurtj behuuërlik gesjrómptj. Noe is dao op zich nieks mis mit bie 'n kleierbank wo neet allein nuuj, mer ouch hieël get gebroekdje kleier haer gebrachtj waere. Ouch die mótte natuurlik sjoeën gewasse en gesjtreke tentoeëngesjtèldj kinne waere. De voele was aevel dae vanne waek boete hóng, woor neet vanne toch al neet zoeë lekker rukendje Brachse lóch. Euver de luppe vanne veurzitter van 't dageliks besjtuur koom amper 'n good waord euver de hanjel en wanjel vanne directeur dae volges häöm mer baeter kós opsjtappe. Op zien beurt zejdje dae directeur weer twiefel euver de integriteit van dae veurzitter en leet 't algemein besjtuur wete neet ech gecharmeerdj te zeen vanne oetsjpraoke oet 't dageliks besjtuur.

Noe de provinciaal geldjkraan toegedrejdj geit waere, liektj 't mit de sjlappe was vanne kleierbank hel bergaaf te gaon. De kuns van good besjture is óm dao achter eige en leefs gesjlaote deure aan te wèrke. Noe oppe boete gehange voele was onnag 'ns van alle kenj mit módder wurtj gesjmete, zeen ich 't duuster in veur de luuj die de kleierbank ech nuuëdig höbbe.

© jan sjure, 14 augustus 2015