trök nao: "columns"

sjräöm

Waat is allewiel nog väöl sjräöm? 'n Vraog die ich mich de lèste tied sjteeds dökker sjtèl. De miljoene en miljarde vlege ós ómme oeëre of 't nieks is. Vanne zomer investeerdje van Gaal bekans 100 miljoen aan sjpelers en of det nog neet genóg woor, koom dao vanne waek nog 'n bod van 85 miljoen op 'ne Duitse sjpits bie. Vief miljard van ós belastingeuro's vlege weer nao Griekelandj en 't insigste det ich goonsdig kós doon is kieke wie Rutte ze d'r van links, rechs en middedoor langs zien oeëre kreeg in 't debat wo 't euver die sjräöm zat ging.

Ouch hie zitte v'r good inne sjlappe was. Vanne 1,6 miljard Essentgeldj det 'n paar jaor geleje Limburg binnekoom, wórt 500 miljoen gereserveerdj veur get groeëte projecte. D'r bleef 1,1 miljard euver det de beuk inging es immunisatiereserve. D'r wórt aafgesjpraoke det 85% daovan rendement zów mótte opbringe en de euverige 15% (165 miljoen) in de vorm van subsidie besjtaedj zów moge waere. Sjräöm zat zóws se dinke óm Limburg en waat dao zoeëal mit van doon haet oppe kaart te zètte.

Dis waek kreeg ich van versjillendje kenj 'n e-pöske doorgesjtuurdj mit 't köpke: "Maak de lèste LiLiLi-daag meugelik". Ich sjreef 'ne maondj geleje al 'ns euver 't fenomeen 'crowdfunding' óm de 5000 euro bie-ein te zeumere die nuuëdig zeen óm 'n uniek Limburgs cultureel evenement oppe bein te haoje. Wo de provincie bliekbaar gèn sjräöm mieër haet óm de Limburgse taal hoeëg te haoje, zeen donore de lèste haop. Wie ich dit sjreef, ging de tèller net euver de 2000 euro. Gaotj massaal nao "www.voordekunst.nl/projecten/3463-lililidaag-1" en laotj de provincie 'n puupke ruke. 't Kin nog 'n paar daag. Veur 'n tientje zeetj g'r al vanne partie. Gèn sjräöm toch?

© jan sjure, 21 augustus 2015