trök nao: "columns"

nog neet

Ich höb d'r 'n tiedje haer mótte zeuke, 't haet get gekosj, mer 'n paar waeke geleje sjove zich twieë Limburgse vlagge door mien brevebös. Ich hej d'r al jaore ein, mer gebroekdje die neet mieër ómdet de ungerste gael baan neet oet 't goje gael gesjneje woor. Twieë nuuj vlagge, 'n sjiek kleintje det al drek 'n vas plaetske kreeg op 't sjpeelhuuske vanne kleinkinjer inne haof, 'n volwasse formaat det, es de ieëste de bèste fieëstelikheid zich aan zów dene, baove mien veurdeur zów moge wappere. Aafgeloupe maondig hej ich die groeëte veur 't ieës kinne gebroeke.

Helaas hej, ich koom d'r aevel te laat achter. Saoves zoog ich op L1 det 't maondig oppe kop aaf twieëhóngerd jaor geleje woor det d'r in Nederlandj 'n nuuj Gróndjwèt wórt aafgekondigdj. In det historisch document van aafgeloupe maondig precies twieëhóngerd jaor geleje, wórt veur de ieëste keer inne vaderlandse gesjiedenis de naam vanne provincie Limburg benumdj. Es d'r ein oetgelaeze reje zów zeen gewaes óm veur de ieëste kieër mien nuuj groeëte vlag oet te hange, woor 't aafgeloupe maondig waal gewaes. Meh nieks van det alles.

Aafgeloupe maondig ging de gesjiedenisbeuk in es 'ne geweune doordewaekse maondig. Zoeë eine wie v'r d'r bekans idder waek eine höbbe. Mer 't historisch feit wórt 'nog neet' gevierdj leet zich laeze oppe websjtek 1Limburg. 'Nog neet' is aevel waal hieël óndudelik geformuleerdj. 't Feit det v'r twieëhóngerd jaor geleje, op 24 augustus 1815, veur 't ieës de beuk inginge es Limburg, wurtj 'nog neet' gevierdj. 'Nog neet', wienieë zów ich daoveur den waal mien nuuj vlag oet moge hange? Euver eine maondj, euver drie maondj of twieë jaor 'n vlag oethange ómdet v'r aafgeloupe maondig get te viere hejje? Ich dink d'r 'nog neet' aan.

© jan sjure, 28 augustus 2015