trök nao: "columns"

groeëtsjpraok

Vanne waek zakdje ich de A2 aaf en wórt net veur Wieërt op 'n laevesgroeët bord welkóm geheite in 'de greunste regio vanne werreld'. Ich kós d'r neet naeve en ómdet 't bliekbaar allemaol veur dae eigeste werreld laesbaar mós zeen, wórt 't mich in 't Ingels veur de vot gesjörgdj. Ich noom aan det 't bord verwees nao de natuur róndj Wieërt. Hieël väöl greun woor d'r aevel neet te zeen inne buurt van 't bord. Ich begós aan michzelf te twiefele of ich 't allemaol waal tegooj gelaeze hej.

Wie ich ieëgister ózze Dumoulin ziene roeëje trui zoog verdedige in de loeëdzjwaor bergetappe in Andorra, kome hieël get beeldjer vanoet de lóch. 't Veel mich op wie greun 't dao allemaol waal neet woor. Gister sjtóng inne Volkskrant 'n artikel euver buim, mit 'n euverzich van wieväöl de 48 Europese lenj per veerkantje kilomaeter nog van die greun jónges höbbe sjtaon. Wie ich mit de Andorrese etappe nog vers in mien geheuge al verwachtj hej, sjtóng 't Pyrenees bergsjtäötje op 'n sjieke viefdje plaats. Nederlandj koom d'r oppe 38ste plaats mer bekaajdj vanaaf.

Zoeë hieël väöl anges es de res van Nederlandj is de regio Wieërt noe ouch weer neet. Wie ich 't bord zoog sjtaon, koom ich van Amsterdam. Nao angerhalf oer kreeg ich neet ech 't idee mich inne regio Wieërt in 'n greuner sjtökske Nederlandj oet te rieje, laot sjtaon in 'n greuner of zoeëgaar 't greunste sjtökske werreld. Thoes pakdje ich mich 'Zoeë kalle vae', 't nuutste Wieërter waordebook oet de kas. Veur 'opsjöpper' vónj ich: blinkert, groeëthannik, kaaljakker, kakert, kale plevuter, kuus, moelemaeker, opschöpper, opsni-jjer, perjan, póffert, priekert, proonker, stoeter, stróffert, tuiner, en tunkveul. Op sjlaag begreep ich 't groeëtsjpraekendj bord 'n sjtökske baeter.

© jan sjure, 4 september 2015