trök nao: "columns"

ungelstebaove

Ich weit neet wo ich aafgeloupe waek mieër van ungelstebaove woor. De beeldje van 't verdrónke Syrisch boeksebäömke op 't sjtrandj van 'n Turkse badplaats of 't berich det Joost Zwagerman neet mieër ónger ós is. Twieë zake die den waal allebei mit de doeëd, mer wiejer neet väöl mit ein van doon höbbe. Twieë gebeurtenisse aevel die idder veur zich behuuërlike brök in mien kael achterlete. Twieë gebeurtenisse die mich idder veur zich oere wakker heelte.

't Is bekans neet veur te sjtèlle, 'n menke inne laeftied van miene aodste kleinzoon, laeveloeës aangesjpeuldj op 'n toeristesjtrandj. 't Is bekans neet veur te sjtèlle, 'ne man dae midde in 't laeve sjtuit, dae 't gans gemaaktj liektj te höbbe en toch besjloot det aan zien laeve 'n inj mós kómme. Twieë laeves die neet mieër gelaefdj waere, twieë laeves die nog prachtige laeves veur zich kóste höbbe. Aylan Kurdi en Joost Zwagerman, twieë name die mich aafgeloupe waek ungelstebaove krege ómdet aan allebei zoeëmer inins 'n ónbegriepelik inj koom.

'n Foto, 't sjpegelendj zandsjtrandj, 'n roeëd t-shirtje, 'n dónkerblaw buukske, zaochsjoemendje golve, 't Hej ouch zoeëmer kuns kinne zeen. 'n Sjtillaeve det door nemes zoeë sjoeën in wäörd gesjilderd hej kinne waere es door de kunscriticus dae 't allemaol neet mieër aan kós zeen. Ich weit neet of 't ein mit 't anger van doon hej, mer waat mich ungelstebaove wakker heel dis waek, wore die beeldje die bleve hange. Beeldje van 'n verdrónke kansloeës menke in Turks zandj, beeldje die veurbiekome van 'ne unieke kunskinner dae op zien bekans ónverbaeterlike meneer sjilderieje toet laeve kós bringe. Laeve det dis waek twieë keer ónbegriepelik wórt aafgebraoke en daomit hieël get los en mich ungelstebaove kreeg.

© jan sjure, 11 september 2015