trök nao: "columns"

mienselikheid

Es ich woonsdigaovendj bie de Algemein Besjouwinge inne Twieëdje Kamer hej gezaete, woor ich weggeloupe of demonsjtratief mit de rök nao de los- en compleet op hol gesjlage Wilders gaon zitte. Zelje höb ich nao zónne populistische zeiver zitte loestere es wie de leider vanne PVV zien visie goof op wie 't wiejer mót mit Nederlandj. De beeldje die ónger zien präötje oet de Kamer kome, sjproke veur zich, de lichaamstaal vanne aanwezige kamerleje bookdeile. 't Kabinet in vak K goof 'n zelfdje beeldj. 't Woor dudelik det 't neet allein veur mich bekans neet aan te huuëre woor.

Natuurlik zeen de greujendje aantalle vluchtelinge 'n groeët probleem wo hieël Europa mit te make haet. Ich zów ouch probere mien hachje te redde es ich in Syrië woondje. Ich vinj 't ouch sjandalig det sjtinkendj rieke buurlenj dao neet thoes gaeve. Ich kreeg ouch 'n vraemdj geveul van ónbehage en sjaemdje wie ich zoog wie mit aete wórt gegoeëdj nao vluchtelinge of wie 'ne aoje geteikendje man in 'ne rolsjtool euver get rails wórt geduujdj. 'n Geveul det aevel in 't nieks veel wie ich Wilders woonsdigaovendj allein mer haat huuërdje zejje, wie hae nao 'n interruptie Nederlandj opreep óm verzèt te plege en massaal nao de AZC's te trèkke.

Naodet Wilders de lies mit gemèndjes hej veurgelaeze die al 'n AZC höbbe, leep Pechtold nao veure en äöpendje 'n sjpontaan applaus óm die gemèndjes te danke veur mienselikheid, Mien maagómdrejjendj geveul verdween. Wie ich gistermörge de foto's van 't AZC in Wieërt inne gezèt zoog sjtaon, zoog ich dao neet de islamitische testosteronbómme, de terroriste, de jihadiste, neet 't Allahu Akbar sjrieëvendj tuig wo Wilders veur waarsjuuwdje. Ich zoog mienselikheid en woor gruuëtsj det ich in 'n mienselik Nederlandj moog wone.

© jan sjure, 18 september 2015