trök nao: "columns"

haenkes

Waat is 't toch det sommige mansluuj in häör gene höbbe? Waat maaktj sommige mansluuj toch in godshieëresnaam toet haenkes? Waat maaktj det sommige mansluuj die op de ein of anger meneer door de manj valle, zoeë nuuëdig de politiek in mótte? Of gans anges gevraogdj, waat maaktj de politiek zoeë aantrèkkelik veur sommige mansluuj die op de ein of anger meneer op häör bakkes zeen gegange? Vraoge die de lèste tied bie mich opkome mer wo ich neet hieël ein-twieë-drie 'n antjwaord op kós vinje.

Neet lang naodet Bram Moszkowicz begin dit jaor zien faillisement kreeg aangezagdj, presenteerdje hae zich es liestrèkker van de partie VNL. De man dae 't jaorelank óntduke van en sjoemele mit belastinge hoeëg in 't vaandel hej sjtaon, geit de ker trèkke van 'n partie die minder belasting betale baove aan 't lieske van politieke ideale opveurtj. Hieël väöl gekker leek 't allemaol neet te kinne waere toetdet dis waek 'n anger gevalle sjter aan 't firmament versjeen. Dirk Scheringa, de man dae es óngernummer mit zien hieël höbbe en haoje door alle bäöm zakdje, es nuje man bie de OP, de óngernummerspartie.

Twieë partieje die oeëts opgerichtj wórte door aafvallige leje vanne partie van Wilders. Twieë partieje die nog noeëts op eige krach de Twieëdje Kamer gehaoldj höbbe. Twieë partieje die gaon probere mit twieë opgepoetsdje haenkes de Nederlandse kezers aan zich te binje. De twieë haenkes die hieël Nederlandj oeëts lete zeen wie 't allemaol neet mós en kós. De twieë haenkes die oeëts haenke de veurste sjtónge mit es liefsjpreuk 'dao krejtj gèn haenke haer', wille mit get nuuj vaere ós landj gaon redde. Veur wie dóm haoje die haenkes ós? Dinke ze soms mit hoonder van doon te höbbe?

© jan sjure, 25 september 2015